Samiti i Komunitetit Politik Europian, i mbajtur në Tiranë, pati pjesëmarrjen e dhjetëra liderëve europianë dhe ndërkombëtarë, por jo të gjithë qëndruan deri në fund.
Presidenti turk Rexhep Taip Erdogan, ai serb Aleksandër Vuçiç, kancelari gjerman Friedrich Merz dhe Sekretari i Përgjithshëm i NATO-s u larguan nga Shqipëria menjëherë pas drekës, duke përfunduar vizitën e tyre vetëm disa orë pas nisjes së punimeve.
Shkaku i largimit të parakohshëm nuk u bë i ditur zyrtarisht, por fakti që katër figura kyçe politike vendosën të ndërpresin pjesëmarrjen e tyre tërhoqi vëmendje dhe u interpretua nga analistët si një detaj me peshë në sfondin e tensioneve gjeopolitike që dominuan agjendën.
Samiti vijoi me pjesën tjetër të liderëve europianë, të cilët fokusuan diskutimet tek mbështetja për Ukrainën dhe nevoja për një qëndrim të bashkuar përballë agresionit rus.
Kjo ide u përqafua nga presidenti francez Emmanuel Macron, i cili theksoi nevojën për një Bashkim Europian që vepron si një front i bashkuar në mbrojtje të vlerave dhe sovranitetit të kontinentit.
Për një ditë, Tirana u kthye në epiqendër të politikës ndërkombëtare, ndërsa temat që dominuan bisedimet përfshinin stabilitetin rajonal, sfidat e sigurisë dhe perspektivën e zgjerimit të BE-së.
Megjithatë, largimi i hershëm i disa liderëve mbeti si një notë e pazakontë në një samit që synonte të dërgonte mesazhe të forta uniteti dhe bashkëpunimi.
