Në orët e para të mëngjesit të kësaj të premteje në Durrës, ka shpërthyer me tritol, makina e një polici. Sipas informacioneve të siguruara nga burimet e “BalkanWeb”, bëhet me dije se makina ishte në pronësi të Lulëzim Kastratit, i cili njihej edhe me emrin si i plotfuqishmi i lagjes 17 në qytetin bregdetar. Për fat të mirë nga shpërthimi janë regjistruar vetëm dëme materiale, ndërsa uniformat blu kanë shoqëruar disa persona në polici, që dyshohen se mund të kenë dijeni për ngjarjen.
E ndërkohë kujtojmë që për ngjarjen e ndodhur mëngjesin e ditës së sotme ka pasur disa persona të shoqëruar, të cilët dyshohen se mund të kenë lidhje me ngjarjen, ndërsa policia bën me dije se mjeti që ka qenë i parkuar pranë banesës ka dëme të pjesshme materiale. Fatmirësisht nuk raportohet për persona të lënduar pasi gjatë momentit të shpërthimit nuk ka pasur persona në automjet apo pranë tij.
Siç shihet edhe nga pamjet mjetit i është vendosur tritol në pjesën e pasme të tij, dhe ngjarja duket më së shumti si një mesazh paralajmërues ndaj punonjësit të policisë.
Grupi hetimor që ka mbërritur në vendin e ngjarjes po punon për zbardhjen e shkaqeve të plota dhe identifikimin e kapjen e autorëve dhe nëse rasti ka të bëjë me detyrën që ka punonjësi i policisë.
