Kryeministri i Kosovës, Albin Kurti me anë të një postimi në rrjetet sociale, ka bërë të ditur se ka zhvilluar një telefonatë me sekretarin amerikan të shtetit, Antony Blinken.
Kurti ndër të tjera ka thënë se në telefonatën që ka pasur me Blinken ka biseduar edhe për praninë e afganëve në Kosovë. Ai ka siguruar se do t’iu ofrojë ambiente të sigurta
“Vlerësimi për mbështetjen dhe bashkëpunimin tonë. Kosova është e nderuar të ofrojë një mjedis të sigurt dhe të sigurt për qytetarët afganë gjatë tranzicionit të tyre. Aleanca jonë me SHBA është e palëkundur dhe miqësia jonë po bëhet më e fortë”, shkroi Kurti.
Kujtojmë se ditën e hënë, ministri i Punëve të Brendshme të Kosovës, Xhelal Sveçla ka bërë të ditur se deri më tani në Kosovë janë strehuar përkohësisht 683 shtetas afganë.
Ministri u shpreh se përveç kampit Bechtel-Enka në Ferizaj, afganët tani po strehohen edhe në kampin ushtarak amerikan, Bondsteel. Aty, aktualisht janë strehuar 91 afganë. Ardhja e qytetarëve të tjerë afganë do vazhdojë edhe gjatë kësaj jave.
Më herët, autoritetet kosovare kanë bërë të ditur se do të strehojnë rreth 2,000 shtetas afganë të cilët kanë punuar me Shtetet e Bashkuara dhe me shtetet anëtare të NATO-s.
Sipas ligjeve në fuqi, Kosova u ka dhënë qëndrim të përkohshëm deri në një vit. Ata pritet të qëndrojnë përkohësisht në Kosovë derisa t’iu rregullohen dokumentacionet për t’u vendosur përfundimisht në Shtetet e Bashkuara ose në ndonjë shtet anëtar të NATO-s.
