Kryeministri në detyrë dhe njëherazi kreu i Lëvizjes Vetëvendosje, Albin Kurti, ka mbërritur sot në takimin e thirrur me krerët e partive politike.
Para se të hynte në mbledhje, ai u shpreh shkurtimisht se do të presë të shohë se kush do t’i përgjigjet pozitivisht ftesës, duke shtuar se shpreson që pas takimit të ketë diçka konkrete për të deklaruar.
“Së pari të shohim kush po vjen dhe si po ecën, pastaj flasim,” u shpreh Kurti para gazetarëve.
Në takim ai ishte i shoqëruar nga dy prej aleatëve të tij politikë: Faton Peci, kryetar i Listës Guxo, dhe Mimoza Kusari Lila, kryetare e Alternativës.
Në mbledhje ka marrë pjesë edhe Fatmir Limaj, kryetari i Nismës Socialdemokrate.
