Kryeministri i Kosovës Albin Kurti në një konferencë për media së bashku me ministrin e Bujqësisë, Faton Peci ka folur edhe për dialogun dhe takimin e mundshëm mes tij dhe presidentit serb Aleksander Vuçiç në Bruksel. Shefi i ekzekutivit u shpreh se s’ka datë për takimin me presidentin e Serbisë dhe takimi varet nga BE-ja.
“Takimi do të mund të ndodhte diku në gjysëmën e dytë të nëntorit sa i përket përfaqësuesve të dy shteteve tona ndërkaq sa i përket udhëheqësve të shteteve nuk ka ndonjë datë për këtë gjë por kjo varet në masë të madhe prej lehtësuesit gjegjësisht prej Përfaqësuesit të Lartë Josep Borell dhe Emisarit të tij Lajçak”, tha Kurti para gazetarëve.
Kurti tha se bllokimi i bokserëve kosovarë nga Serbia për të marrë pjesë në kampionatin botëror shpërfaqi fytyrën e vërtetë të Serbisë.
“Së pari me bllokimin që ua bëri bokserëve tanë Serbia në kufi e shpërfaqi fytyrën e saj si shtet për ata që kanë pasur dilema. Të gjitha këto çështje do të adresohen në Bruksel sepse ne jemi vazhdimisht në komunikim me ta përmes letrave që ua dërgojmë”, tha ai.
Kujtojmë se dy ditë më parë Albin Kurti u kërcënua me jetë, ai u pyet për kërcënimet e bëra ndaj tij dhe shtimin e forcave të sigurinë pranë shtëpisë së tij. Kurti konfirmoi se ka marrë kërcënime por nuk ndjehet i rrezikuar dhe po vijon punën normalisht.
“Së pari unë nuk ndjehem i rrezikuar por janë organet e sigurisë ato që i vlerësojnë kërcënimet dhe i ndërmarrin veprimet në përputhje me rrethanat e caktuara. Përndryshe unë as dje dhe as sot nuk e kam ndryshuar agjendën time”, ka thënë ai.
