Kryeministri në detyrë i Kosovës, Albin Kurti, ka shkarkuar zëvendësministrin e Administrimit të Pushtetit Lokal, Arbër Vokrri, një ditë pasi ky i fundit akuzoi publikisht diplomatë ndërkombëtarë për nxitjen e trazirave në veri të vendit.
Vendimi i Kurtit u bë publik të premten, pasi Vokrri, gjatë një interviste në KTV të enjten mbrëma, deklaroi se një ndër diplomatët që sipas tij kanë nxitur tensione ishte edhe shefi i Zyrës së Bashkimit Evropian në Kosovë, ambasadori Aivo Orav.
Zyra e Kryeministrit e cilësoi të papranueshme këtë deklaratë, duke theksuar se qëndrimet e Vokrrit nuk përfaqësojnë asesi pozicionin zyrtar të Qeverisë së Kosovës.
Sipas njoftimit, deklarata të tilla dëmtojnë marrëdhëniet me partnerët ndërkombëtarë dhe nuk janë në përputhje me politikën e jashtme të shtetit.
Situata në veriun e Kosovës, e banuar kryesisht nga komuniteti serb, ka qenë e tensionuar prej vitesh. Krizat janë thelluar që nga viti 2022, kur Qeveria vendosi të zëvendësojë targat serbe të automjeteve me ato të Kosovës, vendim që shkaktoi dorëheqjen në bllok të zyrtarëve serbë nga institucionet lokale.
Tensionet kulmuan në shtator 2023, kur një përplasje e armatosur në Zveçan mes Policisë së Kosovës dhe një grupi serbësh rezultoi me vrasjen e një rreshteri policie dhe tre sulmuesve.
Që nga ajo kohë, autoritetet kosovare kanë ndërmarrë hapa për mbylljen e dhjetëra institucioneve paralele serbe, në përpjekje për të rikthyer kontrollin shtetëror në veri të vendit.
