Kryeministri Edi Rama ka deklaruar se shumë shpejt do të nisë vaksinimi kundër Covid-19 i moshave mbi 60 vjeç. Këtë të enjte Rama ka qenë në qytetin e Shkodrës, nga ku premtoi rritje të numrit të vaksinuarve, pasi një sasi tjetër dozash priten të mbërrijnë së shpejti.
Pasi të mbarojë vaksinimi i mësuesve, sipas kryeministrit grupi tjetër i të synuarve do të jenë mosha mbi 60 vjeç e më pas gjithë popullsia.
Në fjalën e tij Rama u ndal dhe te sulmet për opozitën, duke i cilësuar mbledhjet dhe takimet e PD si vatra të rrezikshme infeksioni.
Pjesë nga reagimi:
““Lajme të mira, kemi siguruar sasi të konsiderueshme vaksinash, për tu shtrirë fort përtej këtyre kategorive, për të marrë mbarë kategorinë e moshave mbi 60-vjeç. Të vaksinojmë që të ulim zinxhirin e infektimeve. Procesi i vaksinimit po ecën shumë mirë, pavarësisht pezullimit që është bërë në disa vende, po rritet numri i mësuesve të interesuar që të vaksinohen, është me dëshirë dhe jo me detyrim.
Ne duam të vaksinojmë, të vaksinojmë, në mënyrë që të shkëpusim halljën e infektimeve. Vaksinimi është njëra anë, ana tjetër është kujdesi që duhet të kemi. Nuk janë sjelljet e partive politike, mos i fusni të gjitha me një thes, janë partitë e KÇK-së me në krye dhëndrin, që krijojnë një vatër potenciale infektimi në mes të qytetit.
Kjo sfidë nuk ka as parti, dhe as me dallime t që ne kemi në kohë normale me njëri tjetrin. Ata dasmorë duhet të ruajnë veten dhe të tjerët, se këto historitë me flamuj, janë njësoj me ato të viteve 90″, tha Rama nga qyteti i Shkodrës.
