Ditën e djeshme për shkak të reshjeve të shumta të shiut, shumë zona te vednit u përfshinë nga përmbytjet.
Një ditë më pas, kryeministri Edi Rama ka shkuar sot në grykëderdhjen e Lumit Vjosa, për të parë nga afër situatën. Kryeministri Rama është shprehur se falë investimeve të bëra u bë e mundur që 72orët e fundit, gjërat të shkonin mirë.
Rama tha se u tmerrua kur pa situatën në Përmet poshtë, duke menduar se çfarë prurjesh mund të vinin. Sipas tij është e rëndësishme të adresohen ato dy-tre pika që kanë nevojë për ndërhyrje dhe me gjithë këtë nivel reshjesh është për t’u përgëzuar puna e të gjithëve.
Ndërkohë edhe nga ana e banorëve kishte përgëzime për mënyrën se si u menaxhua situata.
Diskutimi i kryeministrit Rama me banorët:
Banori: Na keni nderuar.
Rama: Falë gjithë investimeve të bëra dhe punës së bërë me kanalizimet, por edhe punës fantastike që u bë sidomos në 72 orët e fundit, gjërat kanë kaluar më së miri, po të kemi parasysh ku ishim. Me këtë lloj prurje, shiu deri para disa vitesh dilte deri në qendrën e Fierit dhe përmbyste gjithë dynjanë. Darëzeza që ishte gjithmonë nën ujë, sot nuk është prekur. Ky do që të mbahet lumë i egër dhe ne duam ta mbajmë kështu.
Banori: Neve sivjet na ka shpëtuar kjo puna që keni bërë ju. Nuk na hyri uji në shtëpi. Është për t’u admiruar kjo punë që është bërë këtu, të rrimë shtrembër e të flasim drejt.
Rama: Është problemi i asaj punës që u bë sprapthi, që u ngushtua gryka e Vjosës. Tani duhet parë pjesa e elementëve që duhen shtuar. Aty te pikat ku ka pasur problematikë duhet adresuat, në mënyrë që një rast më pas ta ngushtojmë maksimalisht atë rrezen e dëmit. Kur pashë ato milimetrat e reshjeve dhe situatën në Përmet poshtë, u tmerrova, thashë kushedi çfarë prurjesh do vijnë këtu. E rëndësishme është të adresohen ato dy-tre pika që kanë nevojë për ndërhyrje dhe me gjithë këtë nivel reshjesh është për t’u përgëzuar puna e të gjithëve.
