Ditën e sotme është mbajtur takimi midis ministrit të jashtëm të Rusisë dhe atij të Ukrainës, në Turqi, me qëllimin për të negociuar, por fatkeqësisht asgjë nuk është arritur.
Ndërkohë që pas takimit me homologun e tij ukrainas, Dmytro Kuleba, ministri i Jashtëm rus, Sergey Lavrov krahasoi sërish Kosovën me Ukrainën.
Lavrov u shpreh se kur Kosova shpalli pavarësinë, perëndimi e duartrokiti, por kur bëhet fjalë për rusët në Ukrainë, kjo nuk mund të ndodhë.
“Kur Kosova shpalli pavarësinë, Perëndimi e duartrokiti. Por pse shqiptarët lejohen ta bëjnë këtë, dhe rusët në Ukrainë jo? Shqiptarët u lejuan të punojnë në këtë drejtim nga Perëndimi”, tha Lavrov në konferencë për mediat pas takimit me homologun ukrainas, Kuleba.
Theksojmë se edhe më parë Lavrov e ka krahasuar Kosovën me Ukrainën.
Kujtojmë se gjatë viteve ’90 shqiptarët përjetuan vrasje, përdhunime e shfarosje nga serbët, të cilët ende nuk e njohin Kosovën si shtet të pavarur, por pjesë të territorit të tyre.
Sot Ukraina po përjeton ditën e saj të 15-të luftës me Rusinë.
Rusia ka përshkallëzuar sulmet ndaj civilëve teksa ukrainasit nxitonin të arratiseshin përmes korridoreve të evakuimit. Mbrëmjen e së mërkurës rusët bombarduan një maternitet në Mariupol, ku raportohet se deri më tani janë plagosur të paktën 17 persona dhe tre kanë vdekur, mes tyre një fëmijë.
