Gjykata e Apelit të Posaçëm ka konfirmuar masën e sigurisë “arrest me burg” për Altin Morinën, ish-efektivin e RENEA-s, i cili akuzohet për përfshirje në kultivimin e lëndëve narkotike si pjesë e një grupi të strukturuar kriminal.
Ky vendim është i njëjtë me atë të dhënë nga shkalla e parë. Prokurori i çështjes, Alfred Shehu, paraqiti para gjykatës një dosje prej 26 faqesh përgjimesh të realizuara përmes aplikacionit të komunikimit të koduar “Sky ECC”, të cilat implikojnë Morinën në veprimtarinë kriminale.
Sipas Prokurorisë së Posaçme, Morina ka bashkëpunuar me Durim Bamin dhe një person tjetër të njohur si “Drejtori”, i cili ende nuk është identifikuar nga hetuesit.
Mbrojtja e Morinës ka kundërshtuar akuzat, duke pretenduar se ai nuk ka asnjë lidhje me aktivitetin kriminal të përfshirë në dosje.
Altin Morina ishte shpallur në kërkim nga SPAK pas lëshimit të urdhrit të ndalimit, dhe u arrestua më 4 prill 2025 nga oficerët e Komisariatit Nr. 2 në Tiranë.
Hetimet për këtë çështje kanë përfunduar, dhe ajo është pjesë e një dosjeje më të gjerë që përfshin shtatë grupe kriminale që operonin në qytete të ndryshme të Shqipërisë, përfshirë Lezhën, Durrësin, Krujën, Tiranën, Vlorën dhe Burrelin.
Ky operacion ka rezultuar në lëshimin e 50 urdhër-arresteve, ku afër gjysma janë ekzekutuar, ndërsa disa individë ndodhen në burg për akuza të tjera.
