Teksa kullat shumëkatëshe po pushtojnë kryeqytetin, gazetari Klodian Tomorri ka një reagim të ashpër edhe për mënyrën se si kandidatët për zgjedhjet e ardhshme i qasen këtij fenomeni.
Tomorri përmend disa nga kullat e famshme që i bëjnë hije me katet e tyre të larta kryeqytetit dhe gjithashtu vë theksin tek platforma politike e kandidatëve politikë, që sipas tij duhet të jetë e qartë dhe konkrete në lidhje me këtë çështje.
Sipas gazetarit, secili prej kandidatëve duhet të bëjë të qartë pozicionin, do lejojë apo jo ndërtimin e kullave të tjera në qendër të Tiranës, duke qartësuar elektoratin se për ke duhet të votojë.
Reagimi i plotë i Klodian Tomorrit:
Në krah të Sky Tower, në Bllok, aty ku sot është një parking dhe Vila Ferdinand, po vjen një 30 e ca katesh. Ky është në fazë të avancuar dhe me shumë gjasa është marrë edhe leja e zhvillimit.
Më sipër, ngjitur me Katedralen tek ish-BKT është dhënë miratimi për një 40-katësh. Kësaj iu bënë letrat sikur e dëmtoi tërmeti për t’i hapur rrugë kullës. Tek të dyja këto kulla, ndërtuesi është i njëjtë.
Lart tek Kalaja e Tiranes, aty ku sot është Mileniumi, është në tentativë një tjetër kullë e madhe. Fati i kësaj është pak më i paqartë sepse është shndërruar në objekt sherri. Madje, bashkë me kullën Eyes of Tirana, kjo e Mileniumit është një nga sebepet e tronditjeve në tregun mediatik dhe përmbysjeve dramatike editoriale.
Të tjerë, 60-katësh tashmë janë publike. Me pak fjalë Tirana po kërcënohet nga një vale e re e madhe betonizimi në zonat ku dendësia e popullsisë është në nivele të rekordit botëror. Ajo që po ndodh është ndërtimi i një qyteti, sipas modelit brazilian të favelave, por edhe më i frikshëm, sepse këtu favelat janë me shumë kate.
Për shkak të këtij kërcënimi, kandidatëve për kryetarë bashkie u duhet bërë presion të pozicionohen dhe të qartësojnë programin e tyre në lidhje me këtë çështje. Angazhimet e tipit, që këtë do e vendosin ekspertët apo do ta shohim rast pas rasti nuk mjaftojnë.
Secili prej kandidatëve duhet të bëjë të qartë pozicionin, do lejojë apo jo ndërtimin e kullave të tjera në qendër të Tiranës. Pastaj elektorati e ka të qartë dhe voton.
Nëse qytetarët janë dakord me këtë model të zhvillimit urban, e votojnë. Nëse jo, zgjedhin alternativën që u ofron një tjetër model. Por kjo duhet të jetë e qartë.
