Ndërkohë që numri i viktimave në botë si pasojë e Covid-19 vijon të rritet nga dita në ditë, në mediat vizive dhe ato online nuk kanë munguar as teoritë konspirative në lidhje me koronavirusin.
Shumë lajme të rreme po konfuzojnë njerëzit, kur ajo që duhet të bëjnë në të vërtetë njerëzit është të ruajnë distancimin social dhe të kujdesen për higjenën e tyre personale.
Ky lajm që ka qarkulluar në media ditët e fundit, thotë se fajor për përhapjen e Covid-19 janë antenat 5G.
“Duket se mendjet sublime që thonë se vaksinat janë plot me metale të rënda, kanceri shërohet me urinoterapi, Elvis Presley është i gjallë, tani janë të bindur se Kullat e antenave 5G përhapin Sars-CoV-2 “, tha virologu italian Guido Silvestri, profesor në SHBA në Universitetin Emory në Atlanta.
Edhe profesori Massimo Clementi ka dalë në mbështetje të italianit Silvestri.
Clementi, Drejtor i Laboratorit të Mikrobiologjisë dhe Virologjisë së spitalit San Raffaele në Milano tha se lidhja midis valëve elektromagnetike 5G dhe Covid është më pak se zero dhe lajmet e përhapura janë të rreme.
Ai u shpreh se të mbroje këtë teori është si të thuash se “Toka është e sheshtë”.
Hipoteza se kullat e antenave 5G po përhapin koronavirusin, nuk ka asnjë bazë shekncore dhe teori të tilla nuk duhet të shpërndahen as në media pa u vërtetuar më parë nga ekspertët e fushave përkatëse.
