Kuba është bërë vendi i radhës që ka prodhuar vaksinën e saj të Covid-19. Ajo quhet Abdala dhe thuhet se është 92.28% efektive në provat klinike të fazës së fundit. Ky njoftim vjen vetëm disa ditë pasi qeveria tha se një tjetër vaksinë, Soberana 2, kishte rezultuar 62% efektive në vetëm dy nga 3 dozat e saj.
“Të goditur nga pandemia, shkencëtarët tanë në Institutin Finlay dhe Qendrën për Inxhinierinë Gjenetike dhe Bioteknologjinë janë ngritur mbi të gjitha pengesat dhe na kanë dhënë dy vaksina shumë efektive”, shkroi Presidenti Miguel Diaz-Canel në Twitter.
Njoftimi për vaksinën erdhi nga korporata shtetërore biofarmaceutike BioCubaFarma, e cila mbikëqyr Finlay, prodhuesin e Soberana 2, dhe Qendrën për Inxhinierinë Gjenetike dhe Bioteknologjinë, prodhuesin e Abdala.
Vaksinat pritet të marrin autorizimin për përdorim emergjent nga rregullatorët lokalë së shpejti. Autoritetet e Kubës tashmë kanë filluar administrimin e vaksinave eksperimentale në masë si pjesë e studimeve të ndërhyrjes që ata shpresojnë se do të ngadalësojnë përhapjen e virusit.
Sektori i bioteknologjisë së Kubës ka eksportuar vaksina për dekada, ndërsa tani ka pesë vaksina për koronavirus që janë pretendente për miratim.
Aktualisht, vaksinat që gjejnë përdorim në botë për Covid-19 janë ato të Pfizer, Johnson&Johnson, AstraZeneca, Moderna, Sputnik V, Coronavac dhe Sinovac. Veç Sputnik V, gjithë të tjerat janë miratuar për përdorim emergjent nga Organizata Botërore e Shëndetësisë.
Gazeta Reforma
