Shqipëria rishkroi historinë në futboll, duke u kalifikuar sërish në Kampionatin Europian të futbollit. Lidhur me këtë ka folur edhe presidenti i FSHF-së, Armand Duka, në një intervistë për News24, ku analizoi rrugëtimin e Kombëtares sonë deri më sot.
Gjatë bisedës në studio Duka e cilëson ekipin aktual si më të mirin në historinë e futbollit shqiptar. Ai tha se emocionet më të mëdha i përjtuan më shumë pas ndeshjes me Moldavinë, ku Shqipëria siguroi kualifikimin në Europian.
Ai foli edhe për trajnierin e Kombëtares duke thënë se ai shkroi emrin në historinë e futbollit shqiptar.
“Emrin në historinë e Shqipërisë, Sylvinho e shkruan me punën e tij dhe me rezultate. Deri tani e ka shkruar dhe nuk është e rëndësishme nëse do të ketë emër shqiptar apo pasaportën shqiptare. E rëndësishme është çfarë gjurmësh do të lërë me kontributet e tij në futbollin shqiptar” u shpreh presidenti i FSHF-së.
Ndërsa, sa i përket ekipit të Kombëtares, Duka e cilësoi atë si ekipin më të mirë që kemi pasur deri më sot.
Po, është ekipi më i mirë, jo vetëm me rezultatet, por edhe me përbërjen më të mirë, me futbollistë që luajnë në nivele të larta, ku 7 prej tyre janë pjesë e Serisë, ku luajnë rregullisht, kontribuojnë dhe janë titullarë në Serie A, por edhe me futbollistë të tjerë që luajnë në kampionate të rëndësishme.
Nuk besoj se ka ndodhur më parë që në stolin e Shqipërisë të ishin 3 futbollistë nga La Liga. Këto janë prova për të thënë që është vërtet një ekip i mirë, por jo vetëm këto, edhe performanca në fushë ishte fantastike, duke u marrë 3 ekipeve nga 4 pikë dhe vetëm me Poloninë kemi ndarë pikët. Gjithashtu, kemi fituar me gola të bukur dhe jo më kot në garën për golin më të bukur të UEFA-s janë dy gola të kuqezinjve, i Asllanit në transfertë ndaj Ishujve Faroe dhe ai Asanit ndaj Polonisë në “Air Albania”, si asnjë kombëtare tjetër”, tha ndër të tjera Duka.
