Janë zbuluar detaje të reja nga hetimet mbi atentatin e ndodhur më 17 prill në zonën e Lundrës, ku mbetën të plagosur katër të rinj që udhëtonin me një automjet tip G Class.
Fillimisht, u dyshua se objektiv mund të ketë qenë bashkëshortja e Sidorel Prendit (Roan Brahimi), shtetasja me iniciale A.B., e cila banon në Lundër, por kjo pistë është përjashtuar nga hetuesit.
Grupi hetimor është fokusuar te kamerat e sigurisë, që nga vendi i ngjarjes deri në Lundër, ku u ndal automjeti i shpuar nga plumbat.
Sipas dinamikës së hetuar, dyshohet të ketë ndodhur rreth orës 21 e 30 minuta dhe pas pak minutash mjeti G Class që udhëtonin katër rinjtë mbërrin në Lundër i bërë shoshë nga plumbat dhe vetëm pak minuta më pas rreth 4-5 minuta në Lundër kalon edhe një G Class tjetër i cili ende nuk është identifikuar
Ndërkohë, verifikimet kanë përjashtuar përfshirjen e A.B., e cila në orën e ngjarjes ndodhej në spitalin e Lezhës.
Ajo ishte nisur nga Tirana rreth orës 20:15 për shkak të atentatit ndaj vjehrrit të saj, dhe sipas hetimeve, kishte mbërritur në spital në orën 21:15. Në dëshminë e saj, gruaja ka sqaruar se nuk ka lidhje me atentatin në Tiranë.
Aktualisht, hetimet janë përqendruar tek automjeti tjetër G Class, që mund të ketë qenë objektivi real i atentatit.
Ndërkohë, gazetari Artan Hoxha, i ftuar në Euronews Albania, është shprehur se nuk ka të dhëna që atentati në Tiranë të ketë lidhje me vrasjen e Gjovalin Prendit në Lezhë, babait të Roan Brahimit, që ndodhi po atë ditë. Hoxha theksoi se atentati në Tiranë është organizuar me kujdes, dhe autorët kanë pasur mundësinë të konfirmojnë objektivin e tyre, pasi lëviznin me motor.
Ai përjashtoi mundësinë e një ngatërrese dhe theksoi se autorët kanë përzgjedhur një zonë me mungesë sinjali telefonik dhe pa ndriçim publik, gjë që tregon se goditja është planifikuar në detaje.
Gazetari shtoi se brutaliteti i autorëve bie në sy, duke pasur parasysh se mbi automjetin e të rinjve janë qëlluar 56 plumba një mënyrë veprimi që përdoret vetëm kur synohet eliminimi total i objektivëve.
Kujtojmë se të plagosur nga atentati në Lundër mbetën Arens Stafa (34 vjeç), B. Demiraj (17 vjeç), D. Demiraj (11 vjeç) dhe Kian Mullaj (19 vjeç), dy prej të cilëve të mitur që u transportuan drejt Italisë për trajtim. Po atë mbrëmje, në Lezhë, u ekzekutua në lokalin e tij Gjovalin Prendi, babai i Roan Brahimit.
Megjithatë, hetuesit nuk kanë gjetur prova që të lidhin dy ngjarjet me njëra-tjetrën.
