Në kuadër të rifillimit të aksionit politik në shtator, Partia e Lirisë me në krye Ilir Metën do të zhvillojë protestën e parë.
Kreu i PL-së, Ilir Meta bëri të ditur se protesta do të mbahet të martën e ardhshme te inceneratori i Tiranës. Kreu i Partisë së Lirisë, Ilir Meta ka theksuar sërish se protesta e thirrur më 13 shtator për inceneratorin e Tiranës, është protestë e qytetarëve.
Meta shprehet se “korrupsioni galopant i qeverisë po i zhyt në varfëri ekstreme dhe po i dëbon nga Shqipëria” dhe se shqiptarët duhet të protestojnë çdo ditë. “Protesta e 13 Shtatorit është protesta e qytetarëve! Shqiptarët duhet të protestojnë çdo ditë dhe çdo minutë, sepse korrupsioni galopant i Qeverisë po i zhyt në varfëri ekstreme dhe po i dëbon nga Shqipëria! Të martën, ora 18:00, takohemi të gjithë tek inceneratori i Tiranës, “kryevepra” e paligjshmërisë dhe e korrupsionit”, shkruan Meta.
Kujtojmë që më 25 korrik Ilir Meta tha se partia e tij nuk do të quhet më LSI por Partia e Lirisë. “Tani ka vetëm një rrugë, referendumi! Vetëm referendumi është garancia se Shqipëria do të jetë e shqiptarëve. Nuk ka forcë në botë që t’i blejë 3 milionë shqiptarë. Mos harroni Atdheun, fëmijët tuaj. Fëmijët tanë mund të gjejnë ccdo gjë jashtë, por Atdheu është vetëm këtu. Prandaj ju ftoj në partinë e lirisë, sovranitetit, partinë e referendumit. Partia e Lirisë dhe e të gjithë shqiptarëve. Rroftë Shqipëria e lirë dhe demokratike. Rroftë Kosova shtet i pavarur”, deklaroi Meta.
