Kryeprokurori i Përgjithshëm, Olsjan Çela ka raportuar ditën e sotme në Kuvendin e Shqipërisë mbi gjendjen e kriminalitetit në vend gjatë vitit 2019.
Çela tha se sistemi i ri i funksionimit të institucionit të Prokurorisë mbetet ende për tu parë nëse do të jetë efiçent apo jo.
Tregues për funksionimin e këtij sistemi, sipas tij do të jetë gjendja e kriminalitetit në vend.
Gjithashtu kryeprokurori njoftoi se nëse ky lloj sistemi nuk do të funksionojë siç duhet në Prokurori do të njoftojë Kuvendin.
“Prokuroria është duke përjetuar me ndryshime thelbësore. Roli i ri është ridimensionuar ndjeshëm. Ne jemi përpjekur që gjatë këtyre 6 muajve të maksimizojmë impaktin e prokurorit të përgjithshëm edhe pse ngelet i kufizuar.
Nëse duam të kemi ndryshime të menjëhershme për gjendjen kriminalitetit, Prokuroria e Përgjithshme nuk i ka mekanizmat që të ndikojë në mënyrë të menjëhershme në sistem, nuk merret me çështje konkrete, se sa efikas do të jetë ky sistem mbetet për tu parë. Unë ngelem dhe është një nga prioritetet e mia është të monitoroj me kujdes se si arrin ky institucion i decentralizuar ti përgjigjet nevojave të luftës ndaj krimit.
Ne duam që prokurorët të jenë eficentë në luftën ndaj krimit. Sistemi i ri mbetet për t’u provuar. Mendoj se ka nevojë ende për kohë. Mënyra se si ne po i përqasemi zgjidhjeve ligjore, ne nuk po i shohim me fanatizmin që kjo është zgjidhja perfekte, përkundrazi po i shohim me kritik.
Nëse do të konstatojmë që kjo zgjedhje e bërë nga ky parlament nuk është eficent, nëse do të kemi të dhëna konkrete që do të dëshmojnë këto defekte, atëherë të jeni të sigurt që ne do vijmë përpara jush dhe do themi që nuk po funksionon. Treguesi më i mirë për eficencën do jetë gjendja e kriminalitetit në vend”, tha Çela.
Kryeprokurori Çela raportoi se është ngritur një grup monitorimi për të mbikëqyrur punën në prokurori në mënyre që ligji të zbatohet në mënyrë të njëjtë.
