Policia e Tiranës ka vënë në pranga dy 16-vjeçarë pasi kishin vjedhur në dy biznese ditët e fundit.
Gjithashtu u shpall në kërkim dhe 1 tjetër 16-vjeçar, bashkëpunëtor u tyre.
Ata kishin grabitur në disa biznese 1 laptop dhe 11 celularë, të cilët u sekuestruan nga policia. Në bazë të informacioneve forcat e policisë kanë bërë të mundur lokalizimin e tyre në rrugën Shkozë-TEG.
Gjatë ndjekjes drejtuesi i automjetit hodhi pistoletën nga dritarja e automjetit.
Në tentativë për të ikur automjeti i tyre u përplas me trafikndarësen.
Njoftimi i Policisë:
Tiranë
Finalizohet operacioni policor i koduar “Mesnata”, për goditjen e veprimtarisë kriminale në fushën e vjedhjes së pronës dhe pasurisë.
Zbardhen 2 raste të vjedhjes në dy biznese, të kryera në Tiranë, gjatë ditëve të fundit.
Identifikohen dhe vihen në pranga 2 autorët e dyshuar, të cilët qarkullonin të armatosur me pistoletë dhe gjatë ndërhyrjes nga shërbimet e Policisë, e hodhën pistoletën nga dritarja e automjetit.
Shpallet në kërkim bashkëpunëtori i tyre.
Sekuestrohen një armë zjarri pistoletë, një automjet, një laptop dhe 11 celularë.
Shërbimet e Komisariatit të Policisë Nr. 1, në vijim të punës për goditjen e paligjshmërisë në fushën e vjedhjes së pronës dhe pasurisë, bazuar dhe në inteligjencën informative, organizuan dhe finalizuan operacionin policor të koduar “Mesnata”.
Si rezultat i këtij operacioni u vunë në pranga dy shtetas 16 vjeç, si dhe u shpall në kërkim një bashkëmoshatar i tyre, të tre banues në Tiranë.
Nga veprimet hetimore ka rezultuar se këta shtetas, ditët e fundit, kanë vjedhur një laptop dhe katër celularë, në dy dyqane me pajisje elektronike.
Pas informacineve se autorët e dyshuar po qarkullonin të armatosur, me një automjet, në aksin rrugor Shkozë-TEG, shërbimet e Policisë kanë organizuar punën për kapjen e tyre. Gjatë ndjekjes, drejtuesi i automjetit është larguar dhe ka hedhur një armë zjarri pistoletë, nga dritarja e automjetit. Në tentativë për t’u larguar, drejtuesi i automjetit ka humbur kontrollin dhe e ka përplasur automjetin me trafikndarësen.
Në cilësinë e provës materiale u sekuestruan automjeti, një armë zjarri pistoletë, një laptop dhe 11 celularë.
Vijon puna për dokumentimin e vjedhjeve të tjera që janë kryer nga këta shtetas.
Materialet procedurale i kaluan Prokurorisë pranë Gjykatës së Rrethit Gjyqësor të Juridiksionit të Përgjithshëm Tiranë, për veprime të mëtejshme.
