Policia njofton për 4 të vdekur gjatë protestave të dhunshme që u regjistruan dje, në Kongresin amerikan, nga mbështetës të Donald Trump, të cilët tentuan të pengonin numërimin e votave për të vendosur për presidentin e ri të SHBA-ve.
Kongresmenë republikanë e demokratë e kanë konsideruar të turpshme dhe të pashembullt mësymjen e djeshme në Kongres.
“Ata anëtarë të Kongresit që mbështetën këtë sulm ndaj votës së Kolegjit Zgjedhor do t’i kenë emrat e tyre të shkruar përgjithmonë me bojë dhe të gjithë duhet t’i dinë ata emra”, ka thënë Dan Kildee, anëtari demokrat në Kongres.
Ndërkohë, Policia ka njoftuar se veç gruas së re që u qëllua me armë në gjoks brenda Kongresit dhe ndërroi jetë, edhe tre persona të tjerë fatkeqësisht kanë vdekur. Ata kanë ndërruar jetë gjatë përplasjeve të dhunshme për shkak të vonesës së “urgjencave mjekësore”.
“Një femër dhe dy burra duket se kanë vuajtur nga urgjenca të veçanta mjekësore, të cilat rezultojnë në vdekjen e tyre. Çdo humbje e jetës është tragjike dhe mendimet tona janë me këdo që preket nga humbja e tyre”, ka bërë me dije shefi i Policisë Robert Contee.
Gjithashtu, më shumë se 50 protestues janë arrestuar nga Policia, ndërsa shumë oficerë janë plagosur gjatë përplasjeve me mbështetësit e Trump.
Ndërkohë Presidenti i SHBA është pezulluar nga rrjetet sociale Facebook dhe Twitter për 12 orë pas trazirave që ndodhën në Kapitol Hill të SHBA-së.
Media sociale Twitter shkruan se Trump ka bërë shkelje të përsëritura dhe të rënda të politikës në tre postimet e tij.
“Si rezultat i situatës së paparë dhe dhunës së vazhdueshme në Uashington, kemi kërkuar heqjen e tre postimeve nga [llogaria] @realDonaldTrump – të cilat janë bërë gjatë ditës së sotme – për shkak të shkeljeve të përsëritura dhe të rënda të politikës sonë të Integritetit Civil”, tha platforma sociale.
Rrjetet sociale shprehen se nëse Trump nuk i fshinë postimet në fjalë atëherë llogaria e tij mund edhe të fshihet përfundimisht.
Kujtojmë që mbrëmjen e djeshme përkrahësit e tij sulmuan selinë e qeverisë amerikane dhe u përplasën me policinë, duke çuar në vdekjen e katër personave, mes tyre edhe një grua.
Dhuna solli edhe pezullimin e certifikimit mbi fitoren e zgjedhjeve të Demokratit Joe Biden. Ndërsa më pas nisi sërish puna.
