Ditën e sotme Kryeministri Edi Rama ka zgjedhur të urojë ndryshe shqiptarët për festën e Krishtlindjeve.
Kreu i qeverisë mëngjesin e sotëm ka postuar një video duke na kujtuar edhe një herë tragjedinë e tërmetit shkatërrimtar të 26 nëntorit të 2019, ku humbën jetën 51 viktima dhe u lënduan qindra të tjerë.
Kreu i qeverisë ka publikuar pamje nga shkatërrimi i pronave dhe shumë banesave të qytetarëve kryesisht në Thumanë, Laç dhe Durrës, si pasojë e tërmetit. Ndërkohë, në pjesën e dytë të videon shihen pamje nga rindërtimi i disa banesave.
“MIRËMËNGJES, në këtë ditë të bekuar paqeje, pushimi, reflektimi dhe shprese”, shkruan Rama.
Kujtojmë se mëngjesin e sotëm besimtarët e krishterë në Shqipëri dhe në mbarë botën festojnë sot Krishtlindjen edhe pse përsëri me një vit kufizimesh.
Ky është viti i dytë që Krishtlindja festohet ndryshe, mes masave të vendosura nga pandemia e koronavirusit.
Kështu, në respektim të masave dhe duke shmangur grumbullimet, këtë mëngjes do të mbahet mesha e besimtarëve ortodoksë në katedralen “Ngjallja e Krishtit”. Meshën e mban kryepeshkopi Anastas Janullatos.
Ndërkohë, që mbrëmë në Katedralen e ‘Shën Palit’, Imzot George Frendo ka mbajtur meshën e tij të fundit si Arqipeshkv, e ndërsa përcolli edhe mesazhe për më shumë dashuri dhe paqe mes njerëzve.
