Kryeministri i Kosovës, Avdullah Hoti uron për fitoren kandidatin Demokrat, Joe Biden, si dhe kandidaten për nën-presidente, Kamala Harris. Hoti, nëpërmjet një postimi në llogarinë e tij në ‘Facebook’ ka thënë se nga Administrata e ardhshme pret përforcim të miqësisë të përhershme të Kosovës dhe SHBA-ve.
Postimi i plotë:
“Në emër të Qeverisë së Republikës së Kosovës, i shpreh urimet e mia Presidentit të zgjedhur Joe Biden dhe Kamala Harris, për fitoren e zgjedhjeve presidenciale në Shtetet e Bashkuara të Amerikës. Pres që të forcojmë edhe më shumë miqësinë tonë të përhershme me Shtetet e Bashkuara dhe të vazhdojmë punën tonë së bashku për njerëzit tanë dhe në shërbim të vlerave tona të përbashkëta”, ka shkruar Hoti.
Kryeministri bashkë me delegacionin kosovar, arriti nën udhëheqësin e Administratës Trump të nënshkruajë marrëveshjen për normalizim ekonomik mes Kosovës dhe Serbisë më 4 shtator në Uashington.
Demokrati Joe Biden është zgjedhur presidenti i 46-të i Shteteve të Bashkuara të Amerikës pas një garë të ashpër me republikanin, Donald Trump, i cili synonte të merrte edhe një mandat të dytë.Përgjatë historisë, Joe Biden, njihet për afërsinë dhe miqësinë shumë të ngushtë me shqiptarët, sidomos me Kosovën.
/GazetaReforma.com/
