Monika Kryemadhi, kryetarja e Lëvizjes Socialiste për Integrim nuk ka të ndalur me fushatën nëpër qytete të ndryshme për të bindur qytetarët për votat e 25 Prillit.
Pavarësisht ndëshkimeve nga Policia, për thyerje të rregullave anti-Covid, kryetarja e LSI vijon që takimet ti zhvillojë pa rregullat e distancës dhe maskës.
Teksa LSI ndodhet në rrezikun e shpërbërjes, pas largimeve të shumta të anëtarëve, drejtuesve dhe së fundmi edhe të të rinjëve, ajo ka vijuar me takimet në qytetin e Korçës.
Sipas Kryemadhit, kjo është një qeveri që prodhon kriza. Mes të tjerash ajo akuzoi qeverinë se ka mungesë përgjegjësie dhe menaxhimi të situatës që po kalon vendi ynë për shkak të motit të keq apo dhe pandemisë.
Kujtojmë se LSI para disa ditësh u gjobit me shifrën e 50 milionë lekëve të vjetra, pasi organizuan miting nëkuadër të fushatës elektorale.
Reagimi i plotë:
“E bëmë në këmbë rrugën kur erdhëm. Është kënaqësi për ne që vijmë nga Tirana sepse e shikojmë shumë rrallë. Por ajo që diskutuam me të gjitha gratë në Pogradec apo Maliq ku ishim, është problem. Është problem sidomos për gratë në shtëpi. Sot shikojmë një nga problemet më të mëdha që kemi dhe që ndjejnë familjet shqiptare, aq më shumë në zonat ku ndodhin përmbytje, tërmetet, apo si raste të tilla me reshje të mëdha dëborë që bllokohen rrugët, bllokohet komunikimi midis fshatrave, bllokohet jeta e përditshme, ekonomia, shkolla e spitalet.
Një nga problemet më të mëdha shikojmë indiferencën apo mungesën e përgjegjësisë në menaxhimin e këtyre problemeve. Në ditë me diell kur nuk ka probleme, shikojmë një kryeministër që del nga 5-6 orë, që bën një komunikim mediatik, sikur Shqipëria po buzëqesh. Por në momentin që një vesë shiu bie, përmbytet Tirana, Shkodra, Lezha, Vlora. Një reshje dëbore bie dhe nuk shikon një borë pastruese, nuk shikon kripë të hedhur në rrugë që t’u shërbejë qytetarëve për të lëvizur. Bie tërmeti dhe vazhdojmë akoma njerëzit që flenë nëpër çadra.
Pra mungesa e menaxhimit është kthyer në një qeveri që prodhon krizë. Nuk është që zgjidh problemet, por përkundrazi ia shton ato familjeve shqiptare. Dhe ne këtë e ndjejmë kudo. Edhe dje kur isha në Pogradec, ndihej mungesa e Bashkisë, mungesa e pushtetit vendor. Sepse edhe pushteti vendor që ne faktikisht kemi është i grabitur, jo i votuar nga qytetarët, e ka kthyer në një lloj mungese përgjegjësie, angazhimi ndaj qytetarëve. Për të mos folur pastaj për ekonominë, për papunësinë, për mungesën e hapësirave të zhvillimit të ekonomisë apo të krijimit të mundësive të punësimit të të rinjve.
