Deputetja e Partisë së Lirisë, Monika Kryemadhi, doli nga ambientet e SPAK dhe deklaroi se nuk ka pranuar të flasë para prokurorëve, duke shtuar se do ta bëjë këtë vetëm para Gjykatës së Posaçme të Shkallës së Parë (GJKKO).
Ajo u shpreh gjithashtu për ish-bashkëshortin e saj, Ilir Meta, se është duke u akuzuar për shpifje ndaj saj.
Monika Kryemadhi tha: “Fillon një procedim komplet i ri, do fillojmë lojën me kungulleshka ne dhe prokurorët si dy palë përballë në gjykatë. Tani filluam lojën, pse 5 por 7, kjo është një gjë, unë normal që do njihem edhe me fashikujt, dokumentacionet, letrat, dhe nga ana tjetër do të përballemi me ekspertizën që do të ndërtojë vetë prokuroria dhe ekspertizën financiare që kemi bërë unë dhe mamaja ime. Kërkon përfshirjen e të gjitha palëve, edhe të atyre që kanë gënjyer, edhe të atyre që kanë thënë të vërtetën.”
Ajo shtoi se nuk do të flasë më para prokurorëve dhe do të japë shpjegime vetëm në gjykatë, duke theksuar se çdo deklaratë e saj mund të përdoret kundër saj.
Kur u pyet nëse e kishte uruar Ilir Metën për festat e fundvitit, Kryemadhi u përgjigj: “S’kam si të uroj një njeri që s’ka asnjë lidhje me mua.”
Ju ka sulmuar zoti Meta si një person që duket sikur keni folur në SPAK, lihet të nënkuptohet. A keni bërë ju dëshmi inkriminuese ndaj zotit Meta?
Monika Kryemadhi: “Uroj që të gjithë njerëzit që e iluminojnë zotin Meta me shpifje të tilla të marrin përgjigje në 2025, siç po e marrin disa.”
Kush janë armiqtë tuaj, zonja Kryemadhi?
Monika Kryemadhi: “Dihet kush janë. Ata që kanë folur gjithë ditën dhe natën kundër Monika Kryemadhit me shpifjet e tyre.”
Do të vini sërish në SPAK si denoncuese e aferës së inceneratorëve?
Monika Kryemadhi: “Sigurisht që do të vij. Dhe me thënë të drejtën, sigurisht për një gjë më vjen pak keq. E përgëzoj kryeministrin Rama kur i doli në mbrojtje kryetarit të bashkisë Erion Veliaj kur tha se po e linçoni, po e intimidoni, po i shkatërroni familjen, por harron zoti Rama dhe zoti Veliaj që duhet të hapin borderotë e portaleve dhe mediave që paguhen me paratë e inceneratorëve, për intimidime dhe linçime që i kanë bërë nga familja ime e shumë shqiptarëve me radhë. Të mos bëjnë këto skemat e strehimeve politike për Veliajn se s’kanë më lezet, Veliaj të vijë dhe të përgjigjet këtu. Kemi votuar reformën me 140 vota, ta bëjmë reformë por jo Rama-Formë. GJEDNJ do të jetë ajo që do të na krijojë mundësinë për të ndërtuar dhe ngritur disa gjëra mbi të vërtetat.”
Nëse një parti tjetër, përveç PL-së, do t’ju ftojë të kandidoni në zgjedhjet, do të pranoni?
Monika Kryemadhi: “Jo, jo!”
