Kryeatrja e LSI, Monika Kryemadhi ka qenë në një takim në kuadër të fushatës elektorale në njësinë Nr.5 të kryeqytetit. Kremadhi shprehu mirënjohje për gjithë themeluesit e LSI-së dhe ata që e kanë mbajtur këtë forcë politike në këmbë. Ajo u kërkoi të gjithëve që të trokasin derë më derë pse Tirana e Re është indiferente. Kryemadhi bëri thirrje që qytetarët të votojnë në 25 prill për ndryshimin dhe tha se është e bindur që ky ndryshim do të fillojë nga zemra e Tiranës.
“Iu jam mirënjohëse të gjithë themeluesve të LSI-së dhe atyre që e kanë mbajtur LSI-në në këmbë. Iu jam mirënjohëse të gjithë juve që jeni sot në këtë shi. Iu jam mirënjohës dhe çunave në fund të fushës, çunave të mrekullueshëm të Tiranës së Re. Sot është një ditë që ne kemi hyrë në ditën e parë të javës së fundit, të javës që do t’i japim dërrmën njëherë e përgjithmonë kësaj kalbësire të sistemit të tranzicionit për të larguar njëherë e përgjithmonë këtë lloj sistemi që nuk i lejon njerëzit të jetojnë të qetë dhe të shkollojnë fëmijët e tyre. Këtë lloj sistemi që rrit çdo ditë e më shumë çmimin e ilaçeve për pensionistët dhe nuk mendon kurrë njëherë për të rritur pensionet e tyre. Këtë lloj sistemi që rrit çdo ditë taksat e qytetit, çmimin e ujit, çmimin e energjisë elektrike, çmimet e parkingjeve të makinave tuaja edhe pse jeni në mes të Tiranës dhe keni me vite që jetoni këtu dhe ua masin kokën me pe. Pra për të gjithë ata të cilët ua kanë vështirësuar jetën çdo ditë e më shumë. Sot ju kërkoj të shkoni të votoni më 25 prill, të votoni ndryshimin, të votoni LSI-në. Ju kërkoj të trokisni derë më derë. E di që Tirana e Re është indiferente, është skeptike për ndryshimin, por jam e bindur që ndryshimi në Shqipëri për të mbyllur tranzicionin njëherë e përgjithmonë do fillojë nga zemra e Tiranës, nga Tirana e Re, këtu ku jemi në fushën e Stadiumit ‘Dinamo’ sepse dhe në 97, unë si socialiste në atë kohë, në këtë fushë, në fushën e stadiumit ‘Dinamo’ kemi filluar dhe kemi ndryshuar sistemin që donte të kapte demokracinë në Shqipëri”, tha Kryemadhi.
