Kryetarja e LSI-së, Monika Kryemadhi e nisi fjalën e saj në Kuvend me akuza për policët që sipas saj fshehën rastin e përdhunimit në Kavajë, akuzoi kryeministrin Rama, por në fund u ndal tek ministrat.
Në qendër të akuzave të saj ishte ministrja e Drejtësisë, Etilda Gjonaj, pikërisht pas shkarkimit të katër zyrtarëve një ditë më parë për abuzim me tendera, nga radhët e LSI-së, siç u publikua në media.
“Meqënëse ajo paska dëshirë shumë të madhe për të luftuar korrupsionin po i bëj me dije asaj se shantazhin ndaj gjyqtarëve dhe prokurorëve quhet shkelje ligji. Shumë shpejt do ta faktojmë se si ajo iu bën shantazh. Ka futur në këtë listë edhe motrën e sekretares së saj të Përgjithshme. A e ka luftë personale, a e ka nga budallallëku nuk e di. Është kushërirë nga një lidhje familjare e Ilir Metës por po i bëj me dije se nuk ka asnjë lloj mënyre që e mbron ministren e Drejtësisë që është kapur duke shantazhuar gjyqtarët e prokurorët për shkarkimin e punonjësve të saj. Ajo mund ta dijë shumë mirë se korrupsionin e ka brenda në shtëpi, t’iu tregojë pse iu pushua burri nga puna, t’iu tregojë lidhjet e burrit me Ervis Martinajn. Ndaj them duhet të jetë shumë e kujdesshme me mesazhet”,- tha Kryemadhi.
Kryetarja e LSI-së, Monika Kryemadhi mori në mbrojtje dy deputetet e reja të LSI-së, Kejdi Mehmetaj dhe Floida Kërpaçi.
Ky reagim vjen një ditë pas debatit dhe replikave që ndodhën në komisionin e ekonomisë.
“Dy vajzat deputete Kejdi Mehmetaj dhe Floida Kërpaçi janë diplomuar për farmaci dhe inxhinieri ndërtimi. Këta që kanë këtu mbrapa nuk e dinë se ç’është diploma. Ministrja e Arsimit vjen me një kolegj 1 vjeçar. Elisa e ka apo nuk e ka diplomën. Ne i kemi me diploma në inxhinieri. Mos guxojë më njeri nga ju që të përmendi diplomat sepse po të jetë për çështje diplomash nuk dimë si dalim nga ana juaj se vetëm në një diplomë na e kaloni për t’i lëpirë menderen kryetarit të partisë. Ama asnjëri nuk a të drejtë të cenojë sepse votat e LSI-së janë vota gjaku…“-tha ajo.
