Kryetarja e LSI-së, Monika Kryemadhi iu ka drejtuar një mesazh grave shqiptare, që sipas saj duan ndryshimin për familjet e tyre pas 25 prillit. Përmes një video mesazhi në rrjetin social “Facebook”, Kryemadhi tha se 25 prilli është dita e ndëshkimit më të rëndë për Rilindjen. Gjithashtu, Kryemadhi iu dha fjalën se ky moment historik do bëjë ndryshimin për jetën e fëmijëve dhe familjeve.
MESAZHI I KRYEMADHIT:
“25 Prilli është dita e ndëshkimit më të rëndë për Rilindjen që duke i shërbyer vetëm interesave personale të saj varfëroi njerëzit dhe shpopulloi vendin nga rinia. Entuziazmin për këtë ditë e ndjej më së shumti te gratë shqiptare, të cilat duan ndryshim për familjet e tyre, për fëmijët e tyre. Ju jap fjalën si grua, si nënë, se bashkimi në këtë moment historik do na bëjë të gjithave krenare për ndryshimin që po sjellim në jetët e fëmijëve dhe familjeve tona”, shkroi kryetarja e LSI-së, Monika Kryemadhi.
LSI është aleate e Partisë Demokratike, edhe pse po kandidon në lista të ndryshme. LSI që nga krijimi i saj shumë vite më parë ka qenë gjithmonë forcë e tretë politike dhe ka provuar të jetë edhe në pushtet me aleancat e saj, si me PD-në, ashtu dhe me PS-në.
