Nuk kanë qenë të paktë personat që e kanë “kryqëzuar” opozitën për dorëheqjen nga mandati i deputetit , por mesa duket jo të gjithë zërat janë kundër, pasi një i tillë nga Gjermania është pro.
Bëhet fjalë për kryekëshilltarin e CDU, Martin Henze, i cili thotë se në situatën në të cilën ndodhet vendi jonë, vendimi i marrë nga opozita ka qenë më i kuptueshmi.
Mirëpo kryekëshilltari nuk mjaftohet me kaq, ai shton gjithashtu se jo të gjithë në Evropë mendojnë se dorëheqja nga Parlamenti e opozitës është e gabuar, ka shumë që janë në të njëjtin mendim me të.
“Në Evropë ka mendime kontradiktore për vendimin e PD për djegien e mandateve. Jo çdo informacion që ka ardhur në Shqipëri është i vërtetë pasi këtu vijnë informacione të filtruara dhe të selektuara. PD dhe opozitës i është mohuar e drejta parlamentare pasi nuk funksionon Gjykata Kushtetuese dhe ajo nuk ka mundësi për të apeluar vendimet e parlamentit. Prandaj dhe zgjedhja për largimin nga parlamenti mund edhe të kuptohet”.
Për më tepër, kryekëshilltari ekonomik i CDU-së është shprehur njëjtë si opozita jonë gjithë këto muaj, zgjidhja e situatës janë vetëm zgjedhjet e parakohshme, pasi sipas tij i takon popullit të vendosë sesi do vazhdojë.
“Duke qenë se jemi në një republike Parlamentare dhe Demokratike ai që vendos në fund të fundit është populli. Partitë politike janë të detyruara që të dëgjojnë popullin dhe padyshim përfundimi duhet të jetë zgjedhje të reja në mënyrë që populli të vendosë. Te dy palët të tregojnë përgjegjësi dhe të arrijnë në një përfundim që mund të jenë dhe zgjedhjet”, shton Henze.
Deputetët të cilët po pranojnë të marrin mandatet a mund të zëvendësojnë opozitën në Shqipëri? Ndryshe nga ndërkombëtarët që janë shprehur pro marrjes së mandateve ai thotë se për këtë duhet të vendosë gjykata kushtetuese, pasi ka një vendim politik për djegien e tyre.
“Çështja është më komplekse dhe jo kaq e thjeshtë. Këto deputetë janë nga lista partiake. Këtë mund ta interpretonte vetëm Gjykata Kushtetuese. Dhe për sa kohë Gjykata Kushtetuese nuk mund të marrë një vendim edhe OSBE nuk mund të shprehet”, shtoi Martin Henze.
Mirëpo një pikë shumë e rëndësishme, janë edhe investimet e huaja, për të cilat Henze thotë se për këta biznesmenë nuk është e rëndësishme situata politike, por garancia ligjore që kanë në mbarëvajtjen e veprimtarisë së tyre.
“Më e rëndësishmja për investitorët e huaj është garancia ligjore. Dhe në Shqipëri për momentin nuk funksionon Gjykata Kushtetuese dhe Gjykata e Lartë dhe këto garanci nuk mund t”i jepen investitorëve të huaj. Dhe korrupsioni është në nivele të larta kjo bën që investitorët e huaj të mos vijnë në Shqipëri”,- tha ai.
