Vitali Klitschko u ka kërkuar politikanëve europianë që të ndërpresin të gjitha lidhjet tregtare me Moskën, duke thënë se pagesat ndaj Rusisë janë të mbuluara me “gjak” dhe ndihmojnë për të financuar ushtrinë e saj.
“Çdo euro, çdo cent që merrni ose dërgoni në Rusi ka gjak; janë para të përgjakshme dhe gjaku i këtyre parave është gjaku i Ukrainës. Gjaku i popullit ukrainas.”
Klitschko foli për genocid ndaj ukrainasve, pas një vizite që pati gjatë kësaj jave në qytetet fqinje të Kievit.
Ai thotë se kishte parë civilë të vrarë, përfshirë një grua të moshuar dhe një makinë me një flamur të bardhë dhe fjalën “fëmijë” të shkruar nga jashtë, të cilët ishin qëlluar për vdekje dhe brenda kishte gjak.
Deklaratat, Klitschko i bëri teksa po fliste me video-link në konferencën e kryebashkiakëve në Gjenevë.
Klitschko i shkroi Papës më 8 mars, duke i thënë se prania e tij në Kiev “është çelësi për shpëtimin e jetëve dhe hapjen e rrugës drejt paqes në qytetin tonë, vendin dhe më gjerë”.
Zëdhënësi i Vatikanit pranoi marrjen e letrës, por nuk tha nëse Papa do të vizitonte Kievin apo do të merrte pjesë në një video-konferencë.
Ai tha se Françesku qëndronte me zemër “afër vuajtjeve të qytetit dhe njerëzve të tij, me ata që duhej të iknin dhe me ata që punonin në administratën e qytetit”.
Në një intervistë me Associated Press, pas një beteje rraskapitëse me forcat ruse në periferi të qytetit, ish-kampioni i botës në boks dhe njëkohësisht kryebashkiaku i Kievit Vitali Klitschko heshti për disa sekonda kur u pyet nëse kishte plane për të evakuuar civilët nëse trupat ruse arrinin të merrnin Kievin.
