Disa ditë më parë kryebashkiaku i Divjakës, Fredi Kokoneshi ka rënë viktimë e dhunës. Më pas ai ka bërë denoncim mbi ngjarjen në polici, ku ka treguar se është dhunuar nga një 32-vjeçar.
Lajmin e bëri të ditur vetë policia me anë të një njoftimi zyrtar ku pasqyrohej fakti se Kokoneshi ka bërë vetë denoncim në komisariat.
“Divjakë/ Në datë 11.07.2022, në Komisariatin e Policisë Divjakë ka bërë kallëzim shtetasi F. K., 54 vjeç, banues në Divjakë,(Kryetar i Bashkisë Divjakë), se shtetasi D. S., 32 vjeç, banues në Divjakë, e ka goditur me grushte dhe e ka ofenduar për shkak të detyrës. Specialistët për Hetimin e Krimeve në Komisariatin e Policisë Divjakë, nën drejtimin e Prokurorisë Lushnjë, referuan materialet në Prokurori për vlerësim”, thuhej në njoftimin e policisë së shtetit.
Ndërkohë që tashmë është zbuluar autori që dhunoi kryebashkiakun Divjakës dhe motivi përse e kreu këtë akt.
Mësohet se Fredi Kokoneshi është përfshirë në një konflikt të dhunshëm me nipin e deputetit socialist Paulin Stërkaj. Kokoshi u ofendua dhe u godit me grushte nga nipi i deputetit të Partisë Socialiste Paulin Stërkaj, 32-vjeçari Dritan Stërkaj, administrator i një resorti në Divjakë. Në denoncimin e tij, Fredi Kokoneshi pretendoi është sulmuar fizikisht dy ditë më parë në qendër të qytetit. “Një i ri më goditi me grusht në fytyrë për shkak të detyrës,”-mësohet se është shprehur Kokoneshi në denoncimin e tij. Dyshohet se shkak për sherrin ishte pagesa e taksave ndaj Bashkisë që resorti ka detyrim të paguajë.
Por duhet theksuar se deri më tani nuk ka asnjë njoftim zyrtar mbi këto dyshime, teksa ngjarja është raportuar në polici dhe Prokuroria ka nisur hetimet lidhur me ngjarjen. Po ashtu, autori nuk është ndaluar ende nga policia.
