Pas 17 vitesh pauzë, Kroacia ka vendosur të rikthejë shërbimin e detyrueshëm ushtarak, këtë herë në një formë të shkurtuar dhe të përshtatur me kohën.
Lajmi u bë publik në një konferencë për shtyp në Bibliotekën Kombëtare dhe Universitare në Zagreb, ku zëvendëskryeministri dhe ministri i Mbrojtjes, Ivan Anushiç, së bashku me gjeneralin Tihomir Kundid, prezantuan programin e ri “Stërvitja Bazë Ushtarake – TVO”.
Ky trajnim do të zgjasë tetë javë dhe do të përfshijë të gjithë qytetarët kroatë që mbushin 19 vjeç në një vit të caktuar. Ai do të zhvillohet në kazermat ushtarake të Knin, Slunj dhe Pozhega, me një kapacitet prej deri në 4,000 rekrutë në vit, të ndarë në pesë grupe.
Rekrutët do të paguhen me një shumë neto prej 1,100 eurosh në muaj dhe periudha e trajnimit do të llogaritet si pjesë e kontributit në vite pune.
Stërvitja do të fokusohet në elementët bazë të formimit ushtarak, përdorimin e armëve, lëvizjen taktike, komunikimin, mbrojtjen, reagimin, përgatitjen fizike dhe trajnimin luftarak. Rregulli ditor është i rreptë, dita nis në orën 6 të mëngjesit dhe përfundon në 22:00, ndërsa fundjavat janë pjesërisht të lira. Largimi nga kazermat lejohet vetëm me leje të veçantë.
Ligji parashikon edhe një sërë përjashtimesh apo mundësish për shtyrje. Të papërshtatshmit për arsye ligjore, ata që kanë kryer shërbimin ushtarak në vende të tjera, studentët (mund të shtyjnë deri në moshën 29 vjeç), sportistët profesionistë, personat që jetojnë jashtë vendit ose kanë status ekonomik të vështirë, mund të përjashtohen ose të kërkojnë shtyrje me kusht që kërkesat të dorëzohen në afat.
Po ashtu, ekziston edhe mundësia për zëvendësimin e shërbimit ushtarak me shërbim civil për ata që kanë kundërshtime me natyrë morale apo fetare.
Këta individë mund të angazhohen për tre muaj në mbrojtjen civile ose për katër muaj në institucione lokale ose rajonale. Megjithatë, kërkesat për kundërshtim duhet të jenë të argumentuara, përndryshe mund të refuzohen.
Për shtetasit kroatë me banim jashtë vendit, që nuk janë të regjistruar në regjistrat ushtarakë, ekziston detyrimi të paraqiten në ambasadat ose konsullatat e Kroacisë përkatëse para se të mbushin 29 vjeç.
Sipas qeverisë kroate, qëllimi i kësaj reforme nuk është vetëm forcimi i kapaciteteve mbrojtëse të vendit, por edhe edukimi i të rinjve me disiplinë, qëndrueshmëri dhe aftësi jetësore të dobishme, përfshirë edhe përparësi në punësim pas përfundimit të trajnimit.
