Presidenti i Federatës Ruse, Vladimir Putin dhe lideri i Bjellorusisë, Alexander Lukashenko, kanë bërë me dije se kanë rënë dakord që të takohen në Moskë gjatë javëve të ardhshme.
Lajmin e ka bërë të ditur ditën e sotme Kremlini zyrtar.
Dy liderët nuk janë takuar që prej nisjes së protestave antiqeveritare për zgjedhjet e fundit presidenciale, që i dhanë fitoren Lukashenkos.
Gjatë një telefonate zyrtare ditën e sotme, Putin dhe Lukashenko ranë dakord se ata duhet të forcojnë marrëdhëniet dypalëshe dhe të zgjerojnë bashkëpunimin, ka transmetuar Reuters.
Kremlini njoftoi se është rënë dakord që të mbahet një takim në Moskë në javët e ardhshme.
Vetëm tre ditë më parë, Putin u shpreh se Rusia i ka gati trupat për të ndërhyrë në Bjellorusi, por thekson se këtë gjë do ta bëjë në momentin kur ”ekstremistët të fillojnë të djegin automjetet ose shtëpitë”.
Kujtojmë se para dy ditësh, kryeministri Edi Rama, në cilësinë e kryesuesit të radhës së presidencës së OSBE-së, mblodhi në Vjenë Këshillin Special të OSBE-së për çështjen e krizës në Bjellorusi.
Ndër të tjera Rama theksoi rëndësinë që Minsku të pranojë ofertën e ndërmjetësimit të OSBE-së, duke synuar një dialog konstruktiv ndaj palëve.
Kryeministri shqiptar deklaroi për dialog nuk është një imponim i OSBE-së ndaj Bjellorusisë, por një ofertë ndihme nga një organizatë që krenohet me qasjen e saj gjithëpërfshirëse.
