Kriza energjetikë dhe inflacioni vazhdojnë të rëndojnë në jetesën e qytetarëve dhe po kthehen në një problem shumë serioz për vazhdimësinë dhe stabilitetin e ekonomisë në vend. Klodian Shehu, drejtor i departamentit të Stabilitetit Financiar në Bankën e Shqipërisë deklaron se nëse kriza në vend do të jetë afatgjatë atëherë të gjithë qytetarët do të jenë përballë çmimeve të larta dhe ndoshta të pamundur për t’i përballuar financiarisht. Ai thekson se krahas qytetarëve të prekur do ta gjejnë veten dhe bizneset.
“Periudha në të cilën jemi aktualisht përmban disa sfida të rëndësishme që lidhen me zhvillimet në tregjet ndërkombëtare dhe kryesisht me rritjen e kostos së prodhimit për shkak të çmimeve të larta të energjisë. Nëse kjo do të vazhdojë mund të jetë problem për gjendjen e financiare të bizneseve, familjeve dhe mund të sjellë rritje të kredive me probleme në sektorin bankar”, deklaron Shehu.
Në raportin e 6-mujorit të parë të vitit 2022, Banka Qendrore thotë se qeveria duhet të marrë masa për zbutjen e goditjes ndaj shtresave më në nevojë të shoqërisë.
“Në këtë skenar, në afat të shkurtër marrin rëndësi masat për zbutjen e goditjes ndaj shtresave më nevojtare të shoqërisë dhe shërbimeve kritike, për krijimin e burimeve ose rezervave financiare për blerjen e energjisë së nevojshme përgjatë periudhës së ardhshme vjeshtë-dimër, për përdorimin e energjisë ekzistuese në mënyrë eficente dhe për gjetjen e burimeve të përkohshme shtesë të energjisë”, shkruan raporti.
Kujtojmë se nga 1 tetori ERE miratoi fashat e reja të energjisë. Abonentët familjare që konsumojnë mbi 800 KËH energji në muaj do ta paguajnë më shtrenjtë atë.
