Konfindustria i bëri thirrje politikës, Kuvendit dhe qeverisë që të marrin menjëherë masat për të lehtësuar pasojat e rritjes së pakontrolluar të çmimit të karburanteve. Gjithashtu ka paralajmëruar se rritja e çmimit të karburanteve rrezikon të marri përmasat e një krizë të vërtetë energjetike dhe do të sjellë pasoja të pallogaritshme për vendin. Nga ana tjetër edhe ekspertët kanë bërë thirrje për kontroll pasi çmimet po bëhen me të papërballueshme për konsumatorët.
Lidhur me këtë çështje ka pasur reagime të shumta në opinionin publik dhe nga politika. Kryeministri i vendit Edi Rama, në një deklaratë publike ditën e sotme drejtuar qytetarëve të vendit u shpreh se kjo krizë është botërore dhe se nuk po ndodh vetëm në Shqipëri. Me pak fjalë kryeministri “lau duart” me një deklaratë sqaruese për qytetarët, ashtu si ka bërë edhe për shumë vendime të tjera, të cilat kanë ndikuar drejtpërdrejtë në kurrizin e qytetarëve shqiptarë.
Po të bësh një vëzhgim të shkurtër në vend do të vësh re se çmimi i naftës është rritur me 15 deri në 25 lekë për litër. Pavarësisht se shtrenjtimi i naftës përqendrohet tek çmimi i naftës dhe i benzinës, shtrenjtim i ndjeshëm është vërejtur edhe në çmimin e gazit. Çmimi për një litër naftë ka arritur në 177 lekë nga 161 lekë që tregtohej pak ditë më parë. Po ashtu edhe benzina ka shkuar në 179 lekë litri. Në qoftë se në fillim të këtij viti çmimi i gazit ishte 60-50 lekë për litër, sot arrin në 90 lekë për litër. Në këtë mënyrë çmimi i gazit është rritur me 30-40 lekë. Ekspertët thonë se shkak për këtë rritje është bërë rritja e çmimit të naftës në tregjet ndërkombëtare. Kujtojmë se disa javë më parë një rritje të ndjeshme të ushqimeve të shportës për shkak të rritjes së çmimit të miellit nga disa kompani. Por pavarësisht se qytetarët ngritën zërin Autoriteti i Konkurrencës nuk mori asnjë masë ndëshkuese.
Në një vëzhgim të bërë pak ditë më parë vendi ynë krahasuar me vendet e Rajonit, është rënditur i dyti me një diferencë të ngushtë të çmimit me Serbinë. Pavarësisht se Shqipëria është vend prodhues i naftës, përsëri çmimet janë shumë të larta krahasuar me vendet e rajonit të cilat nuk janë prodhuese. Arsyeja kryesore që çon në këtë nivel çmimi është niveli i lartë i lartë i taksave. Konkretisht shqiptarët paguajnë 5 lloj taksash mbi karburantet duke zënë kështu 60.1% të çmimit final të naftës. Aktualisht për 1 litër naftë, konsumatorët paguajnë 37 Lekë Akcizë për karburante, 27 Lekë/litër Taksë Qarkullimi dhe 3 Lekë/litër Taksë Karboni. Kësaj vlere i shtohet TVSH prej 20%, e cila po ashtu rëndon konsumatorin në masën rreth 33.4 Lekë/litër, duke bërë totalin prej 100.4 Lekë/litër vetëm taksa, pa marrë në konsideratë kosto të tjera të pikave të karburantit që operojnë në Shqipëri.
