Ditwn e sotme Përfaqësuesi Special i Shteteve të Bashkuara për Afganistanin, Thomas West, ka treguar se javën e ardhshme do të shkojë në Doha të Katarit, për takime me udhëheqësit talebanë. Zoti West tregoi për Zërin e Amerikës se Shtetet e Bashkuara janë thellësisht të shqetësuara për krizën humanitare në Afganistan.
Gjendja është shumë e rëndë në shumë pjesë të Afganistanit, ku Programi Botëror i Ushqimit, një organizatë ndihmash e OKB-së, thotë se pothuajse 24 milionë njerëz, ose 60% e popullsisë, vuajnë nga uria akute.
Zëdhënësi i Departamentit të Shtetit Ned Price tha se Përfaqësuesi Special, Tom West do të diskutojë çështje me interes jetik kombëtar për Shtetet e Bashkuara, duke përfshirë çështjet e kundërterrorizmit dhe ndihmat humanitare, në takimet me udhëheqësit talebanë në Doha të Katarit.
Në një intervistë ekskluzive me Zërin e Amerikës të martën, zoti West tha se përkeqësimi i krizës humanitare në Afganistan ka të bëjë shumë me bllokimin e ndihmës ndërkombëtare. Ekonomia afgane varej nga kjo ndihmë në një masë të madhe gjatë 20 viteve të fundit.
Javën e kaluar, zëdhënësi i Ministrisë së Jashtme të talebanëve i bëri thirrje Kongresit amerikan që të zhbllokojë pasuritë afgane të bllokuara pas rënies së Afganistanit në duart e talebanëve. Ai tha se mjerimi ekonomik në vend mund të nxisë një eksod masiv dhe mund të shkaktojë probleme refugjatësh për vendet e tjera. Diplomati West tha se nuk është aq e thjeshtë, siç mund mendojnë talebanët, për të marrë përsëri ndihmat që tashmë janë të bllokuara në Shtetet e Bashkuara dhe vende të tjera.
“Ka arsye ligjore shumë të komplikuara, si dhe arsye gjyqësore, për mos lëvizjen e atyre parave nga banka të veçanta në vende të tjera”, tha ai.
Ka pasur përparim të kufizuar në disa rajone të Afganistanit drejt plotësimit të kërkesave të Shteteve të Bashkuara dhe komunitetit ndërkombëtar nga talebanët për respektimin e të drejtave të njeriut dhe atyre të grave. Shkollat për vajzat nga klasa 7 deri në të 12 janë rihapur në qytetin e tretë më të madh të Afganistanit, Herat.
