Kristjan Asllani, mesfushori i Kombëtares Shqiptare, u prezantua sot në një konferencë për shtyp në prag të ndeshjes së parë të Euro 2024 ndaj Italisë. Gjatë fjalës së tij, Asllani shprehu respekt për kundërshtarët, por edhe besim në forcën e ekipit shqiptar.
Kur u pyet për balancën mes mesfushës shqiptare dhe asaj italiane, Asllani u përgjigj: “Këtë nuk e di, por të them të drejtën Italia është një nga kombëtaret më të forta në të gjithë botën. Edhe mesfusha jonë është shumë e fortë. Do të presim këtë ndeshje dhe të shohim si do të shkojë.”
Duke folur për përgatitjet dhe atmosferën në ekip, ai tha: “Kanë shkuar mirë dhe ka harmoni dhe pozitivitet. Kemi një ndeshje me Italinë dhe po e studiojmë, po shikojmë video, po e presim.”
Asllani gjithashtu diskutoi rëndësinë e mungesës së Nicolo Barella nga Italia, duke theksuar se edhe pa të, Italia ka një mesfushë shumë të fortë me lojtarë si Frattesi. “Ai është një nga mesfushorët më të mirë në botë, por përsëri kanë mesfushorë shumë të fortë, është edhe Frattesi.”
Kur u pyet për ndonjë bast mes tij dhe Frattesit, Asllani tha: “Jo jo nuk kemi bast, por po fituam, si njëri apo tjetri nuk do i flasim njëri-tjetrit për disa ditë.”
Asllani e vuri theksin te forca e grupit shqiptar dhe mbështetja e tifozëve. “Forca jonë është grupi. Kemi tifozët që na mbështesin dhe po presim akoma sa më shumë sepse janë zjarr.”
Sa i përket formacionit, ai tha: “Këto gjëra i vendos trajneri, por ne kemi luajtur në kualifikuese me dy mesfushorë. Por jemi mirë si me dy apo tre në mesfushë. Por në fushë duhet grintë dhe zemra, duhet të luftojmë.”
I pyetur për kundërshtarët italianë që do të preferonte të mos kishte përballë, Asllani tha: “I dua të gjithë në fushë pasi janë shokët e mi dhe janë profesionista. Dua të jem unë në fushë, dua të jenë edhe ata.”
Për Armando Brojën, ai shprehu optimizëm: “Ai mund t’i bëjë dëme çdo ekipi pasi është një lojtar shumë i fortë fizikisht. Shpresojmë që të na bëjë ndonjë gol.”
Duke folur për motivimin e lojtarëve shqiptarë që luajnë në Serie A, Asllani tha: “Do jetë diçka e mirë, por siç thashë duhet të kemi shumë respekt për Italinë, por nuk kemi frikë pasi i dimë dhe ne kualitetet tona.”
Kjo ndeshje pritet me shumë interes nga tifozët shqiptarë dhe është një mundësi e madhe për ekipin kombëtar për të treguar vlerat e tij në skenën europiane.
