Një ngjarje e rëndë me skenar tronditës ka ndodhur këtë të hënë në Pogradec, ku një grua 52-vjeçare është vrarë brutalisht në banesën e saj dhe më pas është tentuar të fshihet krimi përmes një zjarri të qëllimshëm.
Viktima është identifikuar si Kozeta Teço. Fillimisht u raportua se ajo kishte humbur jetën nga asfiksia e shkaktuar nga tymi, pasi banesa e saj ishte përfshirë nga flakët. Por hetimet paraprake të policisë dhe ekspertëve mjeko-ligjorë zbuluan shenja të qarta dhune në trupin e saj: një çarje në grykë dhe një plagë në krah, duke hedhur dyshime të forta për një vrasje të qëllimshme.
Policia ka shoqëruar dhe më pas arrestuar një të ri të dyshuar si autor të krimit, identifikuar si Ilirjan Selmani. Sipas të dhënave hetimore, mes tij dhe viktimës dyshohet se ka pasur një lidhje intime. I riu është dërguar në vendngjarje për të rindërtuar skemën e krimit.
Ndërkohë, në një kazan plehrash pranë vendit të ngjarjes është gjetur edhe arma e dyshuar e krimit, një thikë me të cilën dyshohet se Selmani i ka prerë fytin viktimës, përpara se t’i vinte flakën banesës për të kamufluar ngjarjen si një aksident.
Kozeta Teço jetonte e vetme në apartamentin ku ndodhi krimi. Banorët e zonës vunë re flakët dhe njoftuan menjëherë zjarrfikësen dhe policinë. Trupi i pajetë i 52-vjeçares u gjet nga shërbimet e emergjencës brenda banesës së djegur.
Grupi hetimor është rikthyer në vendin e ngjarjes për të mbledhur prova të tjera dhe për të konfirmuar të gjitha rrethanat e vrasjes së dyshuar, që ka tronditur qytetin e Pogradecit.
