Prokuroria e Kavajës është në përfundim të procedurave të hetimeve për ngjarjen e 7 muajve më parë në Kavajë, ku mbeti i vrarë, Dritan Haxholli.
Vrasja ndodhi brenda shtëpisë së Marsida Qatjas, ku i akuzuari kryesor është shefi i sigurisë në burgun e Durrësit, Bledar Toçi, i cili mbeti i plagosur.
“Shqiptarja.com” shkruan, se Toçi është marrë i pandehur për veprat penale “Prodhim dhe shitje e lëndëve narkotike” dhe “Vrasje në kapërcim të vetëmbrojtjes së nevojshme”.
I pandehur është marrë edhe Bernard Toçi, vëllai i Bledar Toçit, i cili akuzohet për “Prodhim dhe shitje narkotikësh”, pasi në banesën e tij policia gjeti 7 doza me kokainë.
Gjithashtu edhe Marsida Qatja akuzohet për “Vënie në dispozicion e ambjenteve për konsumim të lëndëve narkotike”.
Kujtojmë këtu se ngjarja e rëndë u regjistrua më 10 tetor në Kavajë, brenda apartamentit të Marsida Qatjas.
Aty ishin grumbulluar disa persona të cilët po konsumonin kokainë, mes të cilëve edhe Bledar Toçi.
Vetëm pak minuta më pas aty ka mbërritur Dritan Haxholli me kallashnikov në dorë, i cili ka kërkuar të takojë Marsidën.
Sapo ka parë Toçin brenda në shtëpi ai ka hapur zjarr me kallashnikov, ku njëri nga plumbat e ka kapur shefin e burgut në qafë.
Ky i fundit u kundërpërgjigj duke e qëlluar plot 16 herë me pistoletën e shërbimit, tip “Glock”, duke e lënë të vdekur.
Marsida Qatja ndërkohë dhe viktima, kishin marrëdhënie intime me njëri-tjetrin.
