Abuzimi me tenderat ka çuar para prokurorisë ditën e sotme rektorin e Universitetit Bujqësor të Tiranës, Bahri Musabelliun.
Rektori është thirrur mëngjesin e sotëm në Prokurori për të dëshmuar në bazë të akuzave që janë ngritur për të për abuzim me tenderat.
I gjithë hetimi ka nisur pas zbulimit të disa parregullsive nga agjentët e Krimit Ekonomik në Policinë e Shtetit. Dyshimet janë se Musabelliu ka përfituar fondet publike përmes praktikave korruptive të ndjekura në disa tenderime.
Nga ajo që mësohet situata është e tillë: Është vendosur për të realizuar rikonstruksionin e murit rrethues dhe të njërës prej portave të universitetit. Për të realizuar këtë rikonstruksion është marrë një fond prej 640 mijë dollarësh dhe pikërisht këtu dyshohet se Rektori i Universitetit Bujqësor ka përvetësuar një pjesë të mirë të këtij fondi përmes personave të tretë.
Agjentët e Krimit Ekonomik tashmë i kanë çuar në Prokurori të gjitha provat e zbuluara dhe kanë nisur hetimet për zbardhjen e plotë të gjithë ngjarjes.
