Një tjetër krim brenda familjes, tronditi sot opinionin shqiptar. Tirana u zgjua në mëngjes me një tjetër krim makabër ku dhëndri pasi vrau vjehrrin dhe vjehrrën, kreu vetëvrasje.
Ky krim, është i treti brenda muajit janar. Kujtojmë se në ditët e para të këtij muaji, burri vrau gruan dhe më pas motrën e saj me thikë në Ballsh të Fierit.
Ndërkohë pak ditë me vonë, babai shqiptar në Korfuz, vrau në mënyrë brutale vajzën e tij dhe e varrosi në oborr.
Në një intervistë për gazetareforma.com, sociologia e njohur Entela Binjaku, tregon problemet sociale që shtyjnë shqiptarët të kryejnë krime brenda familjes.
Brenda muajit Janar, kanë ndodhur tre krime të rënda brenda familjes, dhëndrri vrau veten, vjehrrin dhe vjehrren, babai vajzën dhe burri bashkëshorten dhe kunatën. Pse është rritur krimi brenda familjes?
Arsyet duhet të gjenden rast pas rasti, por shpesh herë vetëkontrolli i ulët, largësia mes pjestarëve, dobësimi i lidhjeve emocionale, martesa që kanë humbur shumicën e funksioneve që kanë detyrim t’i kryejnë, rënia e autoritetit prindëror në familje, përditshmëria e vështirë dhe paaftësia e disave për t’u bërë ballë këtyre vështirësive, herë abuzimet me substanca, alkool apo varësitë, mungesa e frikës nga ndëshkimi ligjor, çrregullimet e shëndetit mendor që tregojnë për ekuilibër të brishtë, një e kaluar që ka lënë gjurmë të forta dhe ka shumë anë të errta që nuk janë trajtuar, indiferenca shoqërore ndaj njerëzve në vështirësi, apo dhe mjedise që krijojnë modele sjelljesh agresive, këto janë disa nga arsyet që rrisin prirjen për sjellje kriminale. Familja është e vetme dhe e pambrojtur nga të gjitha këto burime.
Problemet sociale që shtyjnë shqiptarët të kryejnë krime brenda familjes, janë probleme të reja, apo të mbartura gjatë viteve?
Problemet e trashëguara në vite sigurisht kur akumulohen rrisin ngarkesën mbi psikën e individit dhe ajo reflektohet edhe në sjelljen e tij me të tjerë. Kushtet e vështira në të cilat jetojnë familjet në shoqerinë shqiptare rrisin mjaft shkallën e zemërimit apo revoltës së brendshme si reagim ndaj një realiteti që qytetari e ka të vështirë t’i bëjë ballë aq me tepër kur modelet e pabarazive janë kudo në shoqëri.
Kur këtyre problemeve ju shtohen edhe të reja që lidhen me zhgënjime nga pritmënitë, humbja e besimit tek e ardhmja e ndryshme, papunësia e lartë dhe të ardhurat e pakta e te pasigurta, problemet vetem e rëndojnë situatën familjare, ku te mos harrojme është karakteristike kufiri i hollë i ndarjes mes zemërimit dhe dashurisë dhe ku emocionaliteti mes pjestarëve është i lartë. Në këmbim të kësaj nevojitet një energji shumë e madhe për t’i bërë ballë dhe për ta ruajtur familjen nga krimi.
A mund të flasim për një shoqëri të shëndoshë në kushtet që jemi aktualisht? Nëse jo, çfarë duhet të bëjnë instancat shtetërore që të minimizojnë krimet?
Krimi në familje ka vite që ndodh dhe ekspertët kanë vite që flasin, por fuqia e fjalës është më e vogël sesa fuqia e një veprimi të organizuar sipas një platforme të mirëmenduar dhe efektive. Këtë ka kundësinë ta bëjë shteti duke u mbështetur tek ekspertët.
Shteti do të duhet ta ndihmojë familjen që të ketë mundësi të përballojë vështirësitë duke i dhënë më shumë punësim, më shumë perspektiva për jetën, duke rritur këshillimin në komunitet te familjeve në krizë, duke krijuar lehtësira që i vijnë në ndihmë familjes të qëndrojë më e bashkuar, duke zhvilluar fushata kombëtare edukimi të shoqërisë, duke i dhënë më shumë modele të rinjve e fëmijëve që ngjallin besim dhe frymëzim.
Gazetareforma.com
