Sot Gjykata e Lartë vendosi ta shqyrtojë në seancë gjyqësore çështjen e tragjedisë së 21 janarit të vitit 2011, ku mbetën të vrarë 4 protestues të opozitës socialiste.
Mësohet se vendimi u dha në dhomë këshillimi, pas rekursit të familjes Nika, pasi më parë kishin kundërshtuar në disa gjykata vendimin e prokurorëve të posaçëm që ia lanë çështjen për hetim prokurorisë së Tiranës.
Ky vendim i gjyqtarëve të lartë do të thotë që do të thirren palët dhe në një seancë që pritet të ketë përballë secilin pas dy javësh.
Të afërmit e Aleks Nikës, thanë se SPAK, duhet të fokusohet në hetime edhe ndaj ish-ministrit të Brendshëm Lulzim Basha, ish-kryeministrit Sali Berisha dhe ish-komandantit të gardës, Ndrea Prendi.
Në nëntor 2023, Gjykata e Strasburgut shpalli vendimin e radhës për Aleks Nikën, duke gjetur si shkelje mos hetimin dhe mos zbardhjen e vrasjes së tij.
Prej vitesh, prokuroria e Tiranës e ka hapur e pezulluar disa herë hetimin për zbardhjen e dy vrasjeve, atë të Hekuran Dedës dhe të Aleks Nikës, por rezultatet kanë qenë vetëm në kuadrin e akuzave nga ana e qeverisë ndaj prokurorëve të kryeqytetit.
Se kush do ta hetojë 21 Janarin, SPAK apo Prokuroria e Tiranës, kjo do të kuptohet pasi gjykata të dëgjojë palët në seancë.
