Në këtë luftë përballë armikut të padukshëm, COVID-19, rolin më të vështirë e kanë mjekët, të cilët kanë në dorë jetën e njerëzve, por nga ana tjetër nuk dinë shumë rreth virusit që po mban peng të gjithë botën.
Arben Gjata, kreu i Task-Forcës, në një intervistë për RTV ORA ka deklaruar se në të gjithë vendin janë bërë trajnime për personelin mjekësor për të përballuar epideminë.
Gjata u shpreh se prioriteti në këto momente është mbrojtja e atyre që janë në frontin e parë të luftës, për të cilët janë marrë masat e nevojshme.
“Ne kemi patur një parim që nuk e kemi ndryshuar. Ne mbrojmë padyshim personelin mjekësor. I kemi marrë të gjithë masat për t’i ruajtur mjekët. Deri tani kemi vetëm 41 mjekë të prekur pra 10 përqind. Ndërkohë që mesatarja në vende të tjera është 13 përqind. Fatmirësisht kemi shumë pak të prekur në frontin e parë të luftës në spitalin Infektiv. Ndërkohë është bërë trajnim masiv në të gjithë Shqipërinë për mjekët. Është bërë trajnim me personelin primar në këtë mënyrë kur mbaroi trajnimi u futën në luftë edhe mjekët e familjes për të bërë ndjekjen e pacientëve potencialisht të infektuar. E më pas ti rekomandojnë ata për tju nënshtruar testeve.”
Sakaq, Gjata foli edhe për strategjinë e ndjekur nga epidemiologët shqiptarë, e cila deri më tani ka pasur një efekt pozitiv.
“Ka disa mënyra për të vlerësuar shtrirjen reale të pandemisë. Është ndjekur një strategji testimesh që është vendosur nga komiteti i ekspertëve shqiptarë. Është një shifër tjetër, nëse do të kishim një numër më të lartë të infektuarish ne nuk do të kishim kapacitet në spitalet tona. Ne jemi përgatitur për disa skenare. Tani ne jemi në skenarin e parë. Nëse do të marrim epidemitë që ka kaluar Shqipëria nga kolera apo gripi i derrit, shumica e këtyre ekspertëve janë të njëjtë. Nuk është një problem. Problemi është që testimi bëhet në rast të një ndjekje epidemiologjike, bëhen testime të kontaktit. Nisen nga disa parime epidemiologjike. Deri tani jemi në një situatë të kontrolluar. Sa më shumë presione të kenë aq më keq. Ne kemi rezultate relativisht të mira. Kemi një epidemi të kontrolluar me një kurbë të shtypur.”
Ashtu siç kanë parashikuar mjekët kjo javë do jetë e paqëndrushme dhe numri i të infektuarve do pësojë luhatje.
Kështu, ditën e sotme u rrit sërish numri i të infektuarve nga COVID-19, pasi u regjistruan 17 raste në reja në 24 orët e fundit, kurse dje u raportuan vetëm 6 raste.
Fatmirësisht, në dy ditët e fundit nuk ka ndërruar jetë asnjë person.
Mësohet se 4 persona janë të intubuar në spitalin “Shefqet Ndroqi”, kurse në spitalin COVID 1 nuk ka të intubuar, por 5 pacientë janë në terapi intensive.
