Krerë të policisë dhe prokurorisë shqiptare, italiane dhe të Europol kandë dalë sot në një konferencë për mediat online pas finalizimit të operacionit ndërkombëtar “Shpirti” me 38 urdhër-arreste, 28 të ekzekutuara sot.
Drejtuesi i SPAK, Arben Kraja ka dhënë detaje për operacionin e përbashkëte Shqipëri-Itali i cili çoi në arrestimin e 38 personave për trafik droge në disa shtete.
Në fjalën e tij Kraja tha se mes të arrestuarve janë prokurorë, punonjës policie dhe zyrtarë lokalë, të cilët kanë favorizuar bandat e drogës. Gjithashtu kujtojmë se kanë qenë katër bashkëpunëtorë të drejtësisë që kanë dhënë kontributin e tyre në këtë hetim.
“Pati shkëmbim informacioni efektiv dhe të menjëhershëm që u pasua me ekzekutimin e 28 masave të sigurimit të dhëna nga Gjykata e Posoçme.
Është identifikuar gjithë zinxhiri I rrjetit të trafikut të drogës nga kultivimi I saj deri në trafikimin në Itali. Është provuar përfshirja e zyrtarëve në këtë aktivitet kriminal. Bëhet fjalë për prokurorë, policë, administrator të pushtetit lokal. Janë sekuestruar disa milionë euro pasuri. Kanë qenë 4 bashkëpunëtorë të drejtësisë që kanë dhënë kontributin e tyre.
Një vit më parë ishin në një konferencë në Romë ku sqaruam fazën e parë të këtij operacioni dhe unë theksova se do t’i shkojmë deri në fund hetimit për të zbuluar këdo që është i përfshirë që të përgjigjet penalisht, përfshirë dhe zyrtarë publikë.
Jemi në situatën ku e kemi mbajtur premtimin dhe do vazhdojmë në të njëjtën rrugë”, tha Kraja gjatë konferencës së përbashkët me AntiMafian Italiane dhe Eurojust.
Në kuadër të këtij operacioni mësohet se është dhënë masa arrest shtëpie për shpërdorim detyre për prokurorin e Vlorës, Maksin Sota, ndërsa është ndaluar edhe ish-oficeri policisë në Vlorë, Festim Lelaj, i proceduar edhe në kohën kur ministër i Brendshëm ishte Saimir Tahiri.
