Pak ditë më parë një video ku 4 policë dhunuan një 15 vjeçar në zonën e Liqenit, bëri xhiron e mediave, pasi dhuna ndaj të miturit ishte e paprecedentë.
15-vjeçari po lëvizte me biçikletë, kur është ndaluar nga policët të cilët i kanë kërkuar llogari pse ka shkelur orarin që vendosi qeveria në periudhën e karantinimit gjatë pandemisë dhe ushtruan dhunë ndaj tij.
Ditën e sotme drejtori i Përgjithshëm i Policisë së Shtetit, Ardi Veliu ka folur rreth kësaj ngjarjeje në Komisionin e Sigurisë, ku i është kërkuar nga deputetët që të jepte llogari, por ai preferoi të publikonte një video.
Në materialin filmik shfaqej nëna e 15-vjeçarit të dhunuar, Ziada Çobo, e cila shfaqej me armë në dorë.
Veliu këtë video e shiti si një ngjarje të vërtetë dhe tha se kjo ishte edukata që i ka dhënë Ziada Çobo djalit të saj dhe kështu ai justifikoi dhunën e Policisë.
“Shikoni nga çfarë familjë vjen ky fëmijë. Ma treguan këtë video për të treguar se sa i edukuar është ky fëmijë. Nuk dua të justifikohem më. Jo se dua të mbroj Policinë. Por të jemi realist”, u shpreh Veliu.
Mirëpo, në fakt e vërteta është ndryshe, pasi videoja e shfaqur nga ai nuk ishte asgjë më shumë se një pjesë filmi.
Çobo ka qenë aktore në filmin “Dashuria s’mjafon”, që është shfaqur një vit më parë në kinematë shqiptare.
Siç shihet dhe nga fotot, Çobo në instagramin e saj ka promovuar këtë film dhe shihet me pistoletë (që nuk është e vërtetë) në dorë dhe pozon para kamerës.
Nuk e dimë nëse këto detaje i kanë shpëtuar numrit 1 të Policisë, apo kjo ishte një formë për të justifikuar vartësitë e tij.
Megjithatë, si kreu i Policisë së Shtetit duhet të kërkojë më shumë dhe të sigurohet përpara se të akuzojë.
