Kreu i Partisë Demokratike në Sarandë, Hariz Mema ka ndërruar jetë paraditen e sotme për shkak të një ataku kardiak. Ai u gjet i pajetë në rrugë në fshatin Gjashtë të Sarandës.
Ai është dërguar me urgjencë në spital nga familjarët por nuk ka mundur qqë ti mbijetojë infarktit akut.
Mema drejtonte prej pothuajse 7 vitesh degën e Partisë Demokratike në qytetin e Sarandës, ndërkohë që vdekja e tij e papritur ka lënë të tronditur familjarët, por edhe të gjithë miqtë dhe të afërmit.
Deputeti Alket Hyseni ka reaguar pas lajmit për ndarjen para kohe nga jeta të Hariz Memës. Ai e cilëson një qytetar të mirë të Sarandës, familjar të shkëlqyer që dha një kontribut të çmuar për qytetin.
“Lajmi i trishtueshëm për humbjen e jetes së z. Hariz Mema
Një qytetar i mirë i Sarandës, një familjar i shkëlqyer dhe një veprimtar politik që me politesë dhe shpirt demokratik dha një kontribut të çmuar për qytetin dhe zonën tonë.
Marr pjesë në dhimbjen e familjes , të shokëve, miqve, patriotëve dhe antarëve të Partisë Demokratike të Sarandës!”, shkruan Hyseni.
Fillimisht u mendua se kreu i partisë Demokratike të Sarandës ishte në gjendje koma në urgjencë, por më pas u lajmërua dhe lajmi i hidhur i humbjes së jetës.
