Presidenti i vendit, Ilir Meta ditën e djeshme ishte i ftuar në një emision televiziv, ku ka bërë një deklaratë të bujshme. Meta u shpreh se për të mbrojtur Shqipërinë, mund të shuhen edhe fëmijët e tij, duke bërë kështu një paralelizëm me familjen e heroit kombëtar të UÇK-së Adem Jasharit. Ndër të tjera Meta shtoi se ka dy institucione që nuk tunden nga asgjë dhe sipas tij janë Presidenti i Republikës dhe populli i thjeshtë i cili ka në dorë votat.
“Ka dy institucione qe nuk tunden, populli dhe Presidenti i Republikës. Ilir Meta para Shqipërisë nuk pyet as për fëmijët e tij. Edhe fëmijët e Ilir Metës të shuhen si fëmijët e Adem Jasharit, po qe nevoja për të mbrojtur Shqipërinë,“-tha Meta në ‘One TV’.
Në përgjigje të kësaj deklarate të bërë nga Presidenti i Republikës ka reaguar kreu i Aleancës Kuq e Zi, Kreshnik Spahiu i cili ka publikuar një foto krahasuese midis familjens së dëshmorit Adem Jashari dhe fëmijëve të presidentit të vendit Ilir Meta.
Në foton e publikuar Spahiu shkruan :”Fëmijët e Adem Jasharit, përpara se të vriteshin duke mbrojtur atdheun”, duke e vazhduar me ironi në foton e postuar të familjes Meta: “Fëmijët e Ilir Metës, përpara nisjes për të jetuar në vilën në Londër”.
Fëmijët e presidentit të vendit Ilir Meta dhe kryetares së LSI-së, Monika Kryemadhi vazhdojnë aktualisht studimet në Londër.
