Kreshnik Farruku, i njohur edhe si Kreshnik Budlla, është vetëdorëzuar në Policinë e Durrësit.
Pas dorëzimit, autoritetet e vunë atë në masë arresti për t’u vënë në dispozicion të drejtësisë.
Farruku është një emër i njohur në botën e krimit ndërkombëtar, i kërkuar nga autoritetet italiane dhe spanjolle për trafik kokaine, grabitje dhe vrasje.
I akuzuar për disa krime, ai ka përdorur 10 identitete të ndryshme për t’i shpëtuar ndjekjes penale.
Në vitin 2019, ai u arrestua në Madrid pas një operacioni disa mujor të Policisë Spanjolle. Kërkohej me urdhër-arrest evropian nga Italia, ku ishte dënuar me 6 vite e 8 muaj burg për trafik droge.
Pas arrestimit, drejtimin e grupit e mori vëllai i tij, Erniu Farruku, i cili gjithashtu u arrestua në vitin 2012.
Farruku u përfshi në disa episode kriminale që prej vitit 2008, përfshirë një arrestim në Barcelonë më 2010 me 20 kg kokainë. Në vitin 2015, ai ishte shënjestër e një atentati në zonën e “Don Boskos” në Tiranë, ku mbeti i plagosur një kalimtare. Dyshohet se atentati kishte lidhje me prishje pazare droge në Itali, Spanjë dhe Holandë.
Në vitin 2012, Gjykata e Durrësit vendosi sekuestrimin e pasurive të tij me vlerë rreth 1 milion euro, përfshirë një pronë në Gjirin e Lalzit dhe një llogari bankare me mbi 6 milionë lekë, pasuri që dyshohet se janë krijuar nga aktivitetet e paligjshme të grupit të drejtuar prej tij dhe përdorej nga të afërmit e tij.
Operacionet ndërkombëtare për çmontimin e klanit Farruku vazhdojnë, pasi ai akuzohet se ka drejtuar një nga rrjetet më të mëdha të trafikut të drogës në Costa del Sol të Spanjës.
