Kremlini deklaron se Rusia nuk është një kërcënim për Finlandën, përpara vizitës së presidentit finlandez në Turqi, e cila pritet të miratojë ofertën e Helsinkit në NATO. Siç raportojnë mediat e huaja, Finlanda dhe Suedia hoqën politikat prej dekadash të mos-angazhimit ushtarak dhe aplikuan për t’u bashkuar me aleancën perëndimore majin e kaluar pas ofensivës së Moskës në Ukrainë.
“Ne kemi shprehur shumë herë keqardhjen për lëvizjen e Finlandës dhe Suedisë drejt anëtarësimit dhe kemi thënë shumë herë se Rusia nuk përbën kërcënim për këto vende. Ne nuk kemi asnjë mosmarrëveshje me këto vende… Ata kurrë nuk kanë paraqitur ndonjë kërcënim për ne dhe, logjikisht, ne nuk i kemi kërcënuar,” tha zëdhënësi i Kremlinit Dmitry Peskov.
Presidenti turk Rexhep Tajip Erdogan ka pezulluar negociatat me Suedinë, por duket i gatshëm të ratifikojë anëtarësimin e Finlandës. Presidenti finlandez Sauli Niinisto tha se Turqia kishte marrë një vendim për ratifikimin e ofertës së vendit të tij në NATO dhe tha se do të vizitojë Stambollin këtë javë për ta dëgjuar atë nga Erdogan. Turqia dhe Hungaria janë të vetmet vende që ende nuk kanë ratifikuar kërkesat e vendeve, të cilat duhet të pranohen nga të 30 anëtarët ekzistues të aleancës. Rusia e sheh zgjerimin e NATO-s si një kërcënim ekzistencial për sigurinë e saj dhe ka përdorur dëshirën e Ukrainës për t’u bashkuar me aleancën për të justifikuar ofensivën.
