Teksa pak ditë kanë mbetur për mbarimin e mandatit të kreut të Strukturës së Posaçme anti-Korrupsion (SPAK), ende nuk ka asnjë kandidaturë zyrtare për zëvëndësuesin e tij. Gjatë një komunikimi për gazetarët Kraja deklaroi se gara është ende e hapur. E ndërkohë përsa i përket punës së tij në krye të SPAK ai deklaroi se është më e mira e mundshme duke shtuar se është një institucion i ri.
“Institucion i ri, është krijuar çdo gjë nga e para. Besoj që është bërë puna më e mirë e mundshme”, tha ai.
Ndërkohë i pyetur nëse pritet arrestimi i ndonjë të ashtuquajturi “peshk i madh”, Kraja u shpreh se puna vijon çdo ditë dhe përmendi rastin e sotëm të marrjes të pandehur të 10 ish zyrtarëve të qarkut të Lezhës, përfshirë edhe ish kryetarin e bashkisë, të cilët u akuzuan për tjetësim të pronave në bregdet me një vlerë që kapte vlerën 13 mln euro.
Kraja pranoi se ndaj prokurorëve të SPAK janë regjistruar raste presionesh, por se tha se atyre iu sigurohet mbrojtje siç e parashikon ligji.
“Prokurorë e gjyqtarë të SPAK kanë çështje të vështira për të trajtuar qoftë për personazhe të krimit të organizuar. Ka pasur presion, por kanë mbrojtje siç ja parashikon ligji”, tha ai.
