Komisioni Qendror i zgjedhjeve ka regjistruar ne mbledhjen e sotme koalicionin e udhëhequr nga Partia Demokratike nën siglën“Aleanca për Ndryshim”. “Meqë dokumentacioni i paraqitur është në rregull miratohet”, ka thënë kryetari i institucionit të menaxhimit të zgjedhjeve në Shqipëri, Ilirjan Celibashi.
Në këtë koalicion marrin pjesë 6 parti, ku Partia Demokratike, është drejtuesja e këtij koalicioni i cili u depozitua në KQZ pak ditë më parë. Partitë e tjera pjesë e koalicionit opozitar janë PR-ja e Fatmir Mediut, PDIU-ja e Shpëtim Idrizit, PAA-ja e Agron Dukës, LZHK-ja e Dashamir Shehit dhe PBDNJ-ja e Vangjel Dules.
Kujtojmë që Lëvizja Socialiste për Integrim nuk është pjesë e këtij koalicioni, kjo gjë për të maksimizuar votën sipas drejtuesve. PD dhe LSI nënëshkruan një marëveshje ditën e djeshme për bashkëqeverisje në rast fitoreje. Basha dhe Kryemadhi u shprehën se ishte nevoja për bashkim në mënyrë që të rrëzohej qeveria e korruptuar me në krye Edi Ramën dhe të sigurohet ndryshimi për shqiptarët.
Gjithashtu KQZ ka miratuar edhe projektin pilot për votimin dhe numërimin elektronik që do të aplikohet në ZAZ nr. 40 në Tiranë. Përfaqësuesi i PD në KQZ ka thënë se do të japin çdo kontribut që kjo gjë të eci në drejtimin e duhur.
“Do të japim cdo kontribut që do të jetë i nevojshëm që edhe kjo vendimmarrje që do të pasohet nga të tjerat të ecë në drejtimin e duhur” tha Ivi Kaso.
