Komisioni Qendror i Zgjedhjeve ka punlikuar shifrat e pjesëmarrjes në votime deri në orën 14:00. Sipas informacioneve pjesëmarrja deri në këtë orë ka qenë 35.7% në rang vendi. Aktualisht qarku me pjesëmarrjen më të lartë vijon të mbetet Tirana.
Përqindja e bërë publike deri tani, është në bazë të të dhënave që janë raportuar nga qendrat e votimit. Janë 2034 Qendra Votimi që kanë raportuar nga 5199 në total. Dibra është qarku me pjesëmarrjen më të lartë me 41.34 %, më pas vjen Tirana. E fundit është Vlora që raporton një pjesëmarrje të ulët.
Qendrat e votimit janë hapur që në orën 07:00 të mëngjesit dhe do të mbyllen në varësi të mbarëvajtjes së procesit, në orën 19:00.
Deri tani ka pasur incidente në Shkodër, ku një votues u kap duke fotografuar votën. Gjithashtu probleme janë hasur në një qendër votimi në Vlorë, ku po ashtu është fotografuar vota.
Kreu i Komisionit Qendror të Zgjedhjeve ka deklaruar më herët se procesi ka qenë përgjithësisht i qetë. Ai ka kërkuar që problemet e ndryshme teknike të mos trajtohen si probleme politike.
Në këto zgjedhje po përdoret për herë të parë pajisja për identifikimin elektronik të votuesve dhe gjithashtu qendrat e votimit do të jenë të vrojtuara me kamera. Ambasadorët dhe përfaqësuesit e institucioneve ndërkombëtare kanë bërë vazhdimisht thirrje për vetëpërmbajtje nga ana e liderve të partive politike dhe i kanë kërkuar që të tregojnë maturi dhe durim.
